শিঙিমাৰীত বিবাহযাত্ৰী বাছ দুৰ্ঘটনাগ্ৰস্তঃ নিহত ২ আহত ৩০

বঙাইগাঁওঃ বঙাইগাঁও জিলাৰ অভয়াপুৰীৰ শিঙিমাৰীত আজি ৰাতিপুৱা এক ভয়াৱহ পথ দুৰ্ঘটনা সংঘটিত হয়। বিবাহযাত্ৰী কঢ়িয়াই অনা বাছখনে শিঙিমাৰীত প্ৰাতঃভ্ৰমণ কৰিবলৈ অহা এগৰাকী মহিলাক মহতিয়াই প্ৰচণ্ড জোৰে গছত খুন্দা মাৰে।

ফলত মহিলাগৰাকীৰ লগতে বিবাহযাত্ৰী এজন নিহত হোৱাৰ লগতে ৩০ৰো অধিক আহত হয়। যোৰহাটৰ পৰা গৌৰীপুৰ অভিমুখে গৈ আছিল বিবাহযাত্ৰীসকল। নিহতদ্বয় বেদান্ত দত্ত আৰু জুনু বালা ৰায়। বেদান্ত দত্ত দৰাৰ সম্বন্ধীয় ভাতৃ। দুৰ্ঘটনা সংঘটিত হোৱাৰ পিছত ঘটনাস্থলীত উত্তপ্ত পৰিস্থিতিৰ সৃষ্টি হয়।

উত্তপ্ত ৰাইজে অৱৰোধ কৰে ৩১ নং ৰাষ্ট্ৰীয় ঘাইপথ। আহতসকলক চিকিৎসাৰ বাবে অভয়াপুৰী আৰু বঙাইগাওঁলৈ প্ৰেৰণ কৰে। দুৰ্ঘটনাত দৰাৰ পিতৃ-মাতৃসহ বহু আত্মীয় গুৰুতৰভাৱে আহত হয়। দুৰ্ঘটনাগ্ৰস্ত বাছখনৰ নং AS 03 BC 6566।