জামুগুৰিহাটঃ জামুগুৰিহাটৰ আমবাৰীৰ পশু চিকিৎসালয় ও কৃষি কেন্দ্ৰ দুটা দীৰ্ঘদিন ধৰি পৰিত্যক্ত অৱস্থাত থকাৰ বাবেই বৰ্তমান সময়ত ভূত বাংলাত পৰিণত হৈছে৷ ৭০ ৰ দশকতে বৃহত্তৰ জামুগুৰিহাটৰ কৃষক ৰাইজৰ স্বাৰ্থত আমবাৰীত স্থাপন কৰা এই কৃষি কেন্দ্ৰৰ লগতে পশু চিকিৎসালয় বৰ্তমান অস্তিত্বহীন হৈ পৰি জহি খহি গৈছিল৷
এসময়ত অঞ্চলটোৰ অন্যতম পশু চিকিৎসালয় আৰু কৃষি কেন্দ্ৰ হিচাপে পৰিচিত এই দুটা কেন্দ্ৰটিৰ পৰা শ শ কৃষক ৰাইজ উপকৃত হোৱাৰ লগতে এই কেন্দ্ৰটিক সৰোগত কৰি বহু কৃষকে উন্নত প্ৰজাতিৰ গো পালনেৰে উপকৃত হৈছিল৷ পশু চিকিৎসকৰ লগতে ভালে কেইগৰাকী বিষয়া-কৰ্মচাৰীয়ে কাৰ্য্যনিৰ্বাহ কৰি থকা কেন্দ্ৰটি সম্প্ৰতি প্ৰায় ২০ বছৰ ধৰি অব্যৱহৃত হৈ আছে৷
পশু চিকিৎসা বিভাগৰ বিষয়া কৰ্মচাৰী নথকাৰ লগতে কৃষি কেন্দ্ৰটিৰ সকলো মূল্যৱান তথা ব্যৱহৃত সামগ্ৰী ধ্বংসস্তুূপত পৰিণত হোৱাৰ লগতে জহি খহি গৈছে আৱাসগৃহসমূহ৷ এসময়ৰ কৃষি কেন্দ্ৰৰ লগতে পশু বিভাগৰ চহকী এই দুটা চৰকাৰী কাৰ্যালয়টি পুনৰ কাৰ্যক্ষম কৰি তোলাৰ দাৱী জনাইছে গোপালকৰ লগতে বিভিন্নজনে।