বৰপেটাঃ চতুৰ্থ বৰ্ষৰ বাবে কালি নিশা আনুষ্ঠানিকভাবে ৰাজনন্দিনী ভ্ৰাম্যমাণ নাট্যদলৰ আখৰাগৃহ মুকলি কৰে বিশিষ্ট গবেষক পণ্ডিত তথা কৃষ্ণগুৰু আধ্যাত্মিক বিশ্ববিদ্যালয়ৰ অসমীয়া বিভাগৰ মুৰব্বী অধ্যাপক ডঃ মাধুৰ্য্যমণ্ডিত বৰুৱাই। আৰু ৰাজনন্দিনী ভ্ৰাম্যমাণ নাট্যদলৰ চতুৰ্থ বৰ্ষৰ মুখ্য বেনাৰ উন্মোচন কৰে শিল্পী পেন্সনাৰ উমেশ দত্তই।
গাম্ভীৰ্যপূৰ্ণ পৰিৱেশত অনুষ্ঠিত এই অনুষ্ঠানত সভাপতিত্ব কৰে বিৰিণা গোষ্ঠী অসমৰ সভাপতি লীলাধৰ পাঠকে । এই অনুষ্ঠানতে চতুৰ্থ বৰ্ষৰ বাবে পৰিৱেশন কৰিবলৈ লোৱা অৱতাৰ আৰু অজলা ককাই নাট দুখনৰ পাণ্ডুলিপি মুকলি কৰে অসম উদ্যোগিক নিগমৰ উপাধ্যক্ষ জিতু তালুকদাৰ আৰু বিশিষ্ট সমাজকৰ্মী বাণীকান্ত ভূঞাই। নটৰাজৰ প্ৰতিমূৰ্তিত বন্তি প্ৰজ্বলন কৰে চক্ৰ বিষয়া ত্ৰিদিৱ কোঁৱৰে। ভ্ৰাম্যমাণৰ জনক অচ্যুত লহকৰৰ প্ৰতিচ্ছবিত মাল্যাৰ্পণ কৰে বাপুজী মহাবিদ্যালয়ৰ অবসৰী মুৰব্বী অধ্যাপক তথা কন্ঠশিল্পী পৰেশ ভূঞাই।
মুখ্য অতিথি হিচাপে উপস্থিত থাকে বৰপেটা জিলাৰ অতিৰিক্ত আৰক্ষী অধীক্ষক ডঃ প্ৰদীপ শইকীয়া। ৰাজনন্দিনী ভ্ৰাম্যমাণ নাট্যদলৰ মুখ্য পৃষ্ঠপোষক নকুল তালুকদাৰ আৰু প্ৰযোজক পি যে প্ৰিন্সে আত ধৰা অনুষ্ঠানত এইদৰেই কালি দেখিবলৈ পোৱা গল এক নান্দনিক পৰিবেশৰ মাজেৰেই চতুৰ্থ বৰ্ষৰ বাবে ৰাজনন্দিনী ভ্ৰাম্যমাণ নাট্যদলে আত্মপ্ৰকাশ কৰিলে।
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।