জামুগুৰিহাটঃ জামুগুৰিহাটৰ সমীপৰ নাগশংকৰত ১৫ নং ৰাষ্ট্ৰীয় ঘাঁই পথৰ দাঁতিত প্ৰায় ৯.৫০ লাখ টকাৰে নিৰ্মাণ কৰি উলিওৱা হয় “ধণীৰাম ভৱন” নামেৰে এটি আটকধুনীয়া ভৱন৷ নাগশংকৰ জিলা পৰিষদ পুঁজিৰ আবণ্টিত ধনৰে নিৰ্মাণ কৰা এই ভৱনটি আজি শুভ উদ্বোধন কৰে চতিয়া সমষ্টিৰ বিধায়ক পদ্ম হাজৰিকাই৷
নাগশংকৰৰ বিশিষ্ট সমাজকৰ্মী প্ৰয়াত ধনীৰাম শইকীয়াৰ স্মৃতি যুগমীয়া কৰি ৰখাৰ মানসেৰে নাগশংকৰবাসীয়ে লোৱা প্ৰচেষ্টাক আন্তৰিক শলাগ লয় বিধায়ক পদ্ম হাজৰিকাই৷ আনহাতে এই শুভ উদ্বোধনী কাৰ্যসূচীৰ অন্তত নাগশংকৰ নাট্য মন্দিৰ প্ৰাংগণত ধনীৰাম শইকীয়াৰ সোৱঁৰণত এখনি স্মৃতিচাৰণ সভাও অনুষ্ঠিত হয়৷ সভাত প্ৰয়াত ধনীৰাম শইকীয়াই ৰাজনৈতিক, সামাজিক, শৈক্ষিক ক্ষেত্ৰখনলৈ আগবঢ়োৱা বৰঙণিৰ ওপৰত আলোকপাত কৰে অঞ্চলটোৰ ভালেকেইগৰাকী বিশিষ্ট ব্যক্তিয়ে৷
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।