ৰঙিয়াঃ ৰঙিয়াৰ সোমাজেৰে যোৱা ৩১ নং ৰাষ্ট্ৰীয় ঘাইপথত ভয়ংকৰ পথ দুৰ্ঘটনা। দুৰ্ঘটনাত এজন ব্যক্তি নিহত হোৱাৰ উপৰিও এজন ব্যক্তি গুৰুতৰভাৱে আহত হয়। মৃত ব্যক্তিজনক বৰ্তমানলৈ চিনাক্ত কৰিব পৰা নাই যদিও আহত ব্যক্তিজন নলবাৰীৰ মিহিৰ প্ৰতিম দত্ত বুলি জানিব পৰা গৈছে। ঘটনাৰ বিষয়ে জানিব পৰামতে বৃহস্পতিবাৰে (আজি) দিনৰ ভাগত প্ৰায় ৫০ বছৰীয়া এজন ব্যক্তিয়ে নলবাৰী দিশৰপৰা যাত্ৰীবাহী বাছত আহি ৰঙিয়াত নামে।
ব্যক্তিজনে বাছৰপৰা নামিয়ে ৰাষ্ট্ৰীয় ঘাইপথটো পাৰ হ’ব লওতে নলবাৰী অভিমুখৰ পৰা অহা AS-14E-2733 নম্বৰৰ গ্লেমাৰ বাইক এখনে ব্যক্তিজনক খুন্দা মাৰে। মূহুৰ্ততে পথৰ ওপৰত বাগৰি পৰা ব্যক্তিজনক স্থানীয় ৰাইজে ৰঙিয়া অসামৰিক চিকিৎসালয়লৈ নিয়ে যদিও ব্যক্তিজনক মৃত বুলি ঘোষণা কৰে। ইফালে বাইক আৰোহী জনক ৰঙিয়াৰ এখন ব্যক্তিগত চিকিৎসালয়ত ভৰ্তি কৰোৱা হয়।
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।