জামুগুৰিহাটঃ চতিয়া সমষ্টিৰ অন্তৰ্গত জামুগুৰিহাটৰ নদুৱাৰ মণ্ডল বিজেপিৰ এখন বৰ্ষীয়ান নেতা কৰ্মীৰ অন্তৰংগ আলাপ অনুষ্ঠান অনুষ্ঠিত হয়৷ আজি দিনৰ ১২ বজাৰ পৰা জামুগুৰিহাটৰ শ’লগুৰিত বিজেপিৰ শোনিতপুৰ জিলা সভাপতি বাটাচ ওৰাংৰ সভাপতিত্বত অনুষ্ঠিত অনুষ্ঠানৰ আঁত ধৰে যুৱ সমাজকৰ্মী ৰাতুল নাথে৷ অনুষ্ঠানত চতিয়া সমষ্টিৰ বিধায়ক পদ্ম হাজৰিকাই মুখ্য অতিথি হিচাবে অংশগ্ৰহণ কৰি সমষ্টি উন্নয়নৰ খতিয়ান দাঙি ধৰে৷
বিধায়ক গৰাকীয়ে সমষ্টিটোৰ প্ৰতিটো পঞ্চায়ত এলেকাত এটাকৈ চকুত লগা বৃহৎ উন্নয়নমূলক আচঁনি ৰূপায়ণ কৰিবলৈ প্ৰতিগৰাকী পঞ্চায়তৰ সভাপতিৰ লগতে জিলা পৰিষদৰ সদস্যক নিৰ্দেশ প্ৰদানৰ কথা সদৰি কৰে৷ নদুৱাৰ মণ্ডল বিজেপিৰ সভাপতি জয়ন্ত বৰাৰ আতিথ্যত অনুষ্ঠিত সভাখনিত নদুৱাৰ মণ্ডলৰ শতাধিক বৰ্ষীয়ান বিজেপি নেতা কৰ্মীৰ লগতে সকলো শ্ৰেণীৰ দলীয় কাৰ্য্যকৰ্তাৰ আৰু পঞ্চায়তৰ কৰ্মকৰ্তাসকল উপস্থিত থাকে৷ অন্তৰংগ আলাপ অনুষ্ঠানটিত নদুৱাৰ মণ্ডল বিজেপিৰ সভাপতি জয়ন্ত বৰা আৰু তেওৰ পত্নীয়ে প্ৰতিগৰাকী বৰ্ষীয়ান নাগৰিকক একোখনকৈ ফুলাম গামোচাৰে সম্বৰ্ধনা জ্ঞাপন কৰাৰ উপৰিও চৰন চুই আৰ্শিবাদ গ্ৰহণ কৰাৰ লগতে ভৱিষ্যতৰ দিন সমূহত আগুৱাই যোৱাৰ ক্ষেত্ৰত সু দিহা পৰামৰ্শ কামনা কৰে৷
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।