ডুমডুমাঃ ডুমডুমাৰ দাইচাজান চাহ-বাগিচাত এটা মৃতদেহ উদ্ধাৰ হোৱাত এক উত্তপ্ত পৰিস্থিতিৰ সৃষ্টি হৈছে| দাইচা হালখোৱা গাঁৱৰ জীতেন তাঁতী নামৰ প্ৰায় 50 উৰ্দ্ধৰ ব্যক্তি গৰাকীয়ে 24 ডিচেম্বৰ তাৰিখৰ পৰা নিৰুদ্দেশ হোৱাৰ পিচত আজি দাইচাজান চাহ-বাগিচাৰ 9 নং চেকচনৰ এটা নলাত লোকজনৰ ক্ষত-বিক্ষত মৃতদেহ উদ্ধাৰ হয়| তালাপ থানাৰ আৰক্ষী ঘটনাস্থলীত উপস্থিত হোৱাৰ লগে লগে স্থানীয় ৰাইজে আৰক্ষীৰ দলটোক ঘেৰাও কৰি পৰিস্থিতি উত্তপ্ত কৰি তুলে|
মৃতকৰ পৰিয়াল আৰু স্থানীয় লোকৰ অভিযোগ অনুসৰি ব্যক্তি গৰাকীৰ নিৰুদ্দেশ সম্পৰ্কে 26 ডিচেম্বৰ তাৰিখে তালাপ আৰক্ষীক অৱগত কৰা হৈছিল যদিও আৰক্ষীয়ে বিষয়টো সন্দৰ্ভত কোনোধৰনৰ গুৰুত্ব প্ৰদান নকৰি তদন্তৰ খাতিৰতো পৰিয়ালৰ পৰা কোনো কথা জানিবলৈ ইচ্ছা নকৰিলে আৰক্ষীয়ে| আজি ব্যক্তি গৰাকীৰ মৃতদেহ উদ্ধাৰ হোৱাত আৰক্ষীৰ গাফিলতিৰ ফলত এনে ঘটনা সংঘটিত হবলৈ পালে বুলি স্থানীয়লোকে আৰক্ষীক ঘেৰাও কৰি তীব্ৰ প্ৰতিবাদ জনাই| উল্লেখযোগ্য বাগিচাখনত ইয়াৰ পূৰ্বেও কেইবাটাও হত্যাকাণ্ডৰ ঘটনা সংঘটিত হৈছে যদিও আৰক্ষীৰ দুৰ্বলতাৰ বাবে হত্যাকাৰীৰ কোনো শুংসুত্ৰ নোলাল|
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।