জামুগুৰিহাটঃ গাঁও অঞ্চলৰ দৰিদ্ৰ জনসাধাৰণৰ উপাৰ্জনৰ অন্যতম উৎস হিচাবে ছাগলী পালনে এক ভূমিকা পালন কৰি আহিছে৷ অতি পৰিতাপৰ কথা যে এচাম অসৎ প্ৰবৃত্তিৰ লোকে দৰিদ্ৰ লোকৰ মুখৰ ভাত কাঢ়ি খোৱাৰ প্ৰৱনতাৰে ছাগলী চুৰিত নামি পৰিছে৷ জামুগুৰিহাটৰ নিকটবৰ্ত্তী চতিয়া অঞ্চলত বিগত সময়ছোৱাত বহু ছাগলী চুৰিৰ ঘটনা সংঘটিত হৈছে৷
চতিয়া আৰক্ষীয়ে শেহতীয়াকৈ ছাগলী চোৰৰ বিৰুদ্ধে অভিযান আৰম্ভ কৰিছে৷ কালি দিনৰ ভাগত চতিয়াৰ গেৰেকী গাঁৱৰ পৰা এজনী ছাগলী চুৰি হয়৷ চতিয়া আৰক্ষীয়ে ছাগলীৰ গৰাকীয়ে দিয়া গোচৰৰ ভিত্তিত অভিযান চলাই আজি চতিয়াৰ খাটোৱাল গাঁৱৰ পৰা ভৈৰৱ বৰা নামৰ এটা চোৰক চুৰি কৰা ছাগলীৰ সৈতে আটক কৰে৷ আৰক্ষীয়ে আজি ছাগলী চোৰ ভৈৰব বৰাৰ বিৰুদ্ধে গোচৰ পঞ্জীয়ন কৰি জেল হাজোতলৈ প্ৰেৰণ কৰে৷
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।