ঈদৰ আনন্দ উল্লাসৰ মাজতে লখিমপুৰত পথ দুৰ্ঘটনা

লখিমপুৰ: ঈদৰ আনন্দ উল্লাসৰ মাজতে লখিমপুৰত সংঘটিত হৈছে এক অঘটন। ১৫ নং ৰাজপথৰ গণেশ মন্দিৰৰ সমীপত ভয়ংকৰ পথ দুৰ্ঘটনা সংঘটিত হৈছে। দুৰ্ঘটনাত থিতাতে নিহত এজন যুৱক। আন দুজন যুৱকৰ অৱস্থা সংকটজনক। নিহত যুৱকজনৰ নাম ৰফিক আলি বয়স ২৪ বছৰ। সংকটজনক দুই যুৱক ক্ৰমে মহম্মদ আলি আৰু ৰাজেশ বাস্ফৰক উত্তৰ লখিমপুৰৰ অসামৰিক চিকিৎসালয়ত চিকিৎসাধীন কৰোৱা হৈছে।

তিনিওৰে ঘৰ লখিমপুৰৰ পূৱ চান্দমাৰীত বুলি জানিব পৰা গৈছে। পহুমৰা ফালৰ পৰা লখিমপুৰ নগৰলৈ বুলি AS 07-N 2530 নম্বৰৰ এখন স্কুটিৰে গৈ থকা অৱস্থাত ৰাখি থোৱা ট্ৰাকত পিছফালৰ পৰা খুন্দা মৰাত সংঘটিত হ'ল এই শোকাৱহ ঘটনাটো। নিহত ৰফিক আলিক লখিমপুৰৰ অসামৰিক চিকিৎসালয়ত মৰনোত্তৰ পৰীক্ষাৰ বাবে প্ৰেৰণ কৰা হৈছে।

ঈদৰ আনন্দৰ মাজতে সংঘটিত শোকাৱহ দুৰ্ঘটনাটোক কেন্দ্ৰ কৰি অঞ্চলবাসীৰ মাজত শোকৰ ছাঁ পৰিছে।