নগৰবেৰাঃ দোষীক ফাঁচীৰ দাবী আৰু প্ৰশাসনৰ বিৰুদ্ধে কল্যাণপুৰ গাঁৱত শ-শ লোকে মৃতদেহ সন্মুখত ৰাখি সাৱ্যস্ত কৰে এই প্ৰতিবাদ। বুধবাৰৰ নিশা গাঁৱখনত দুই পক্ষৰ মাজত সংঘটিত হোৱা ভূমি কেন্দ্ৰিক সংঘৰ্ষত গুৰুতৰভাৱে আহত মিজানুৰ ৰহমান(৪৫)নামৰ লোকজনক GMCH লৈ নিয়া অৱস্থাতে মৃত্যু ঘটিছিল।
উল্লেখ্য যে পুৰুষ-মহিলাসহ প্ৰায় দহজনকৈ লোক আহত হৈছিল উক্ত সংঘৰ্ষত, তাৰ মাজৰে মিজানুৰ ৰহমান আৰু এজনক GMCH লৈ নিয়া হৈছিল যদিও মৃত্যু ঘটে মিজানুৰ ৰহমানৰ। মৃতদেহ ঘৰলৈ ওভটাই নি এই হত্যাকাণ্ডত জড়িতসকলৰ উপযুক্ত শাস্তি প্ৰদানৰ দাবীত মৃতদেহ সন্মুখত ৰাখি ৰাইজ প্ৰতিবাদ মুখৰ হৈ পৰে।
আনহাতে প্ৰশাসনৰ লোক উপস্থিত নোহোৱা পৰ্যন্ত মৃতদেহ সৎকাৰৰ দিহা কৰা নহয় বুলিও আকোঁৰগোজ হৈ পৰে প্ৰতিবাদী ৰাইজ। ভূমি কেন্দ্ৰিক সংঘৰ্ষত এজনৰ মৃত্যু আৰু প্ৰতিবাদী কাৰ্যসূচীয়ে উত্তপ্ত হৈ পৰে নগৰবেৰাৰ কল্যাণপুৰ অঞ্চলটো।
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।