বাহাৰঘাটঃ নলবাৰী জিলাৰ বৰভাগ অঞ্চলৰ বিশিষ্ট সংগীত শিল্পী, দানবীৰ তথা সমাজৰত্ন বঁটা প্ৰাপক প্ৰয়াত কুশল কুমাৰ তালুকদাৰৰ আজি প্ৰথম মৃত্যুবাৰ্ষিকী উপলক্ষে বৰভাগৰ বৰগাছা(ভৰালটোলা) গাঁৱৰ নিজা বাসভৱনত ৰাজহুৱা শ্ৰদ্ধাঞ্জলি অনুষ্ঠানৰ আয়োজন কৰে৷ প্ৰয়াত তালুকদাৰৰ পৰিয়াল বৰ্গৰ সহযোগত সোঁৱৰণি গ্ৰন্থ সম্পাদনা সমিতিৰ উদ্যোগত আজি দিনৰ ভাগত আয়োজিত অনুষ্ঠানৰ আৰম্ভণিতে প্ৰয়াত তালুকদাৰৰ স্মৃতিসৌধ উন্মোচন কৰে কমলপুৰ সমষ্টিৰ প্ৰাক্তন বিধায়ক সত্যব্ৰত কলিতাই৷ স্মৃতিসৌধ উন্মোচন পিচতে সোঁৱৰণী গ্ৰন্থ সম্পাদনা সমিতিৰ সভাপতি সমীন্দ্ৰ নাথ মহন্তৰ সভাপতিত্বত অনুষ্ঠিত সোঁৱৰণী গ্ৰন্থ উন্মোচনী সভাত সোঁৱৰণী গ্ৰন্থ উন্মোচন কৰে বিশিষ্ট সাহিত্যিক অৰুন দাসে৷
সভাত পশ্চিম বড়িগোগ ধীৰদত্ত উচ্চতৰ মাধ্যমিক বিদ্যালয়(বৰখালা)ৰ অবসৰপ্ৰাপ্ত অধ্যক্ষ নিৰঞ্জন চন্দ্ৰ ডেকা, প্ৰয়াত তালুকদাৰৰ বাল্যবন্ধু ফনীন্দ্ৰনাথ চক্ৰৱৰ্তী, বিশিষ্ট চিকিৎসক ডা০ কামেশ্বৰ লহকৰেও প্ৰয়াত সমাজকৰ্মী গৰাকীক সোঁৱৰি বক্তব্য দিয়ে৷ তদুপৰি সভাত ধমধমা মহাবিদ্যালয়ৰ অৱসৰপ্ৰাপ্ত অধ্যক্ষা দিপালী দেৱী, নলবাৰী জিলা বিজেপিৰ সভাপতি তথা প্ৰয়াত তালুকদাৰৰ সম্পৰ্কীয় ভাতৃ ডা° মৃগাংক তালুকদাৰ,সম্পৰ্কীয় জেষ্ঠ্য ভাতৃ ৰমেশ ডেকা প্ৰমুখ্যে কেইবাগৰাকীও বিশিষ্ট লোকে অংশগ্ৰহণ কৰে৷
সভাৰ আৰম্ভণিতে প্ৰয়াত তালুকদাৰৰ প্ৰতিচ্ছবিত বন্তি প্ৰজ্বলন আৰু পুস্পাঞ্জলি দিয়ে সহধৰ্মিনী সংগীতা তালুকদাৰে৷ সোঁৱৰণী গ্ৰন্থ সম্পাদনা সমিতিৰ সম্পাদক মুকুল লহকৰে আঁতধৰা অনুষ্ঠানটোত বৰভাগ জ্যেষ্ঠ নাগৰিক মঞ্চ, বৰভাগ মহাবিদ্যালয়, বাহাৰঘাট আঞ্চলিক শাখা সাহিত্য সভা, বৰভাগ প্ৰেছ ক্লাৱ, দক্ষিণ ৰঙিয়া প্ৰেছক্লাৱ, দামোদৰধাম পৰিচালনা সমিতি, বৰগাছা শ্ৰীশ্ৰী দুৰ্গাপূজা মণ্ডপ পৰিচালনা সমিতি আদি কৰি অজস্ৰ অনুষ্ঠান-প্ৰতিষ্ঠানৰ লগতে পৰিয়াল তথা আত্মীয় স্বজনে স্মৃতিসৌধত পুস্পাঞ্জলি প্ৰদান কৰে৷
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।