তামুলপুৰ: বাক্সা জিলাৰ তামুলপুৰ আৰক্ষী থানাৰ অন্তৰ্গত কুমাৰীকাটা আৰক্ষী চকীৰ অধীনৰ কুমাৰীকাটাৰ জলাহ ৰোডত আজি পুৱা এক পথ দুৰ্ঘটনা সংঘটিত হয়। পথ দুৰ্ঘটনাত চাৰিজন শিশুসহ এজন লোক গুৰুতৰভাৱে আহত হয়। ঘটনাৰ বিৱৰণী মতে আজি পুৱা চেচাপানী গাঁওৰ অলেন বসুমতাৰী (৫০) ব্যক্তিজনে বাইকেৰে নিজৰ চাৰি সন্তানক বিদ্যালয়ত থবলৈ আহি থকা অৱস্থাত জালাহ ৰোডত এখন মালবাহী টেম্পো ভেনৰ লগত মুখামুখি সংঘৰ্ষৰ ফলত পথ দুুু্ৰ্ঘটনাটো সংঘটিত হয়।
পথ দুুৰ্ঘটনাত নৱজিৎ বসুমতাৰী (১২), গুনজন বসুমতাৰী(৬), ইফৰান বসুমতাৰী (৭), কৃষ্ণ মনি বসুমতাৰীৰ (১৩) লগতে পিতৃ অলেন বসুমতাৰী (৫০) আহত হয় বুলি জানিব পৰা গৈছে। পথ দুৰ্ঘটনা সংঘটিত হোৱাৰ লগে লগে স্থানীয় ৰাইজে কুমাৰীকাটা আৰক্ষী চকীত খৱৰ দিয়ে।
খৱৰ পোৱাৰ লগে লগে কুমাৰীকাটা আৰক্ষী চকীৰ এটি আৰক্ষী দল ঘটনাস্থলীত উপস্থিত হৈ আহত শিশু আৰু পিতৃজনক উদ্ধাৰ কৰি কুমাৰীকাটা ৰাজ্যিক চিকিৎসালয়ত ভৰ্তি কৰায় যদিও চিকিৎসকে আহত শিশু আৰু পিতৃজনক সংকটজনক অৱস্থাত গুৱাহাটী মেডিকেল কলেজ হাস্পাতাললৈ পেৰণ কৰে। ইপিনে দুৰ্ঘটনা সংঘটিত কৰি টেম্পো ভেনখনৰ চালকজন পলাই যায় যদিও টেম্পো ভেনখন আৰক্ষীয়ে জব্দ কৰে।
