বিলাসীপাৰা: বিলাসীপাৰাৰ টিলাপাৰাত শুকুৰবাৰে ভয়াৱহ পথ দুৰ্ঘটনা সংঘটিয় হয়। নিয়ন্ত্ৰণ হেৰুৱাই ৩১ নং ৰাষ্ট্ৰীয় ঘাইপথৰ দলং এখনৰ তলত পানীত বাগৰি পৰে যাত্ৰীবাহী টেম্পো। ফলত থিতাতে নিহত হয় এটি চাৰি বছৰীয়া শিশু। আৰু গুৰুতৰভাবে আহত টেম্পোখনত থকা নজনকৈ যাত্ৰী। নিহত শিশুটি গুটিপাৰাৰ হবিবৰ ৰহমানৰ পুত্ৰ নুৰ মহম্মদ বুলি জানিব পৰা গৈছে।
শুকুৰবাৰে নিয়ন্ত্ৰণ হেৰুৱাই ৰাষ্ট্ৰীয় ঘাইপথটোৰ টিলাপাৰা বজাৰৰ সমীপত সংঘটিত হয় এই পথ দুৰ্ঘটনাটো। নম্বৰপ্লেট বিহীন টেম্পোখনে দহ-বাৰজন যাত্ৰীলৈ বিলাসীপাৰাৰ পৰা চাপৰৰ দিশে গৈ আছিল। চাপৰলৈ যোৱাৰ পথত টেম্পোখনে নিয়ন্ত্ৰণ হেৰুৱাই দলং এখনৰ তলত পানীত বাগৰি পৰে। পিছত স্থানীয় লোকে ব্যাপক তৎপৰতাৰে উদ্ধাৰ অভিযান চলাই পানীৰ তলৰ পৰা যাত্ৰীসকলক জীৱন্তে উদ্ধাৰ কৰিবলৈ সক্ষম হয় যদিও এটি চাৰি বছৰীয়া শিশুক মৃত অৱস্থাত উদ্ধাৰ কৰে।
পৰবৰ্তী সময়ত আহতসকলক চাপৰ চিকিৎসালয়ত ভৰ্তি কৰোৱা হয়। ঘটনাটিয়ে অঞ্চটোত গভীৰ শোকৰ ছাঁ পেলাইছে।
