জামুগুৰিহাটঃ শোনিতপুৰ জিলাৰ জামুগুৰিহাটৰ কাথৰবাৰী খেল পথাৰত আজিৰ পৰা আৰম্ভ হোৱা ভলীবল প্ৰশিক্ষণ কাৰ্য্যসূচী শুভ উদ্বোধন কৰে চতিয়া সমষ্টিৰ বিধায়ক পদ্ম হাজৰিকাই৷ বিধায়ক গৰাকীয়ে ৰঙা ফিটা কাটি খেল পথাৰত প্ৰবেশ কৰি নিজে হাতত ভলীবল লৈ খেল প্ৰদৰ্শন কৰাও পৰিলক্ষিত হয়৷ উত্তৰজামুগুৰি ভলীবল প্ৰশিক্ষণ কেন্দ্ৰৰ উদ্যোগত আয়োজিত এই প্ৰশিক্ষণ কাৰ্য্যসূচী উদ্বোধন কৰি বিধায়ক গৰাকীয়ে উদ্যোক্তা সকলৰ প্ৰচেষ্টাৰ শলাগ লৈ কয় যে আমি অঞ্চলটোৰ শিশু, ছাত্ৰ-ছাত্ৰী ও যুৱক-যুৱতী সকলক ক্ৰীড়াৰ প্ৰতি আকৰ্ষিত কৰিব লাগে৷ যিহেতু ক্ৰীড়াৰ জৰিয়তেই শাৰিৰিক মানসিক উৎকৰ্ষ সাধন কৰিব পাৰি৷ উত্তৰ জামুগুৰি ভলীৱল প্ৰশিক্ষণ কেন্দ্ৰৰ সভাপতি যোগেন কাকতি আৰু সম্পাদক জয়ন্ত ভূঞাই জানিবলৈ দিয়া মতে প্ৰতি দিনে বিয়লি তিনি বজাৰ পৰাই আৰম্ভ হ’বলগীয়া এই ভলীৱল প্ৰশিক্ষণ কাৰ্য্যসূচী অনিৰ্দিষ্ট কাললৈ চলি থাকিব৷
