বিহালীত বিহু কৰ্মশালাৰ সামৰণি

বিহালীঃ অসমীয়াৰ বুকুৰ আপোন হিয়াৰ আমঠু স্বৰূপ ব'হাগীক নতুন ৰূপত সজাই তোলাৰ প্ৰয়াস বিহালী বিধানসভা সমষ্টিৰ অন্তৰ্গত বগীজুলী জাতীয় বিদ্যালয়ৰ অধ্যক্ষা সুৰভী নাৰ্জাৰীৰ। তেখেতৰ নেতৃত্বত চলি থকা ১০০ গৰাকী নাচনীৰ ১৫ দিনীয়া বিহু কৰ্মশালাৰ আজি ঢোলৰ  গুমগুমনিৰে সফল সামৰণি পৰে। বিহালী সমষ্টিৰ অন্তৰ্গত বিভিন্ন জাতি জনজাতিৰ বসতিৰস্থল বগীজুলী অঞ্চল।

সেই স্থানতে বগীজুলী জাতীয় বিদ্যালয়ৰ অধ্যক্ষা সুৰভী নাৰ্জৰীৰ সাংস্কৃতিক মনে ৰূপায়ণ কৰিলে ১০০ গৰাকী স্থানীয় অসমীয়া, বড়ো, কাৰ্বি, বেঙ্গলী, নেপালী, মিচিং যুৱতীক বিহুৰ প্ৰশিক্ষণ দিয়াই গঢ়ি তুলিলে নাচনীৰূপত। সুৰভীৰ এনে প্ৰচেষ্টাক অঞ্চলবাসীয়ে শলাগ লৈছে। প্ৰায় তিনিশতাধিক বিহুবলিয়া ৰাইজৰ উপস্থিতিত সোমবাৰে বিহু কৰ্মশালাখনিৰ সফল সামৰণি ঘটে।