ডিজিটেল ডেস্ক: আৰ্টফেডৰ পৰিচালন সঞ্চালক মুকুল ডেকালৈ টাইমছ বিজনেছ এৱাৰ্ড। আৰ্টফেডৰ পৰিচালন সঞ্চালকৰ দায়িত্ব লৈয়েই প্ৰতিষ্ঠানটোলৈ তুমুল পৰিৱৰ্তন আনিবলৈ সক্ষম হৈছে মুকুল ডেকাই। বৰ্তমান আৰ্টফেডৰ ব্যৱসায় সন্তোষজনক। ইতিমধ্যে আৰ্টফেডৰ উদ্যোগত শিপিনী সমাৰোহ, বিভিন্ন প্ৰদৰ্শনী অনুষ্ঠিত কৰি হস্ততাঁত আৰু বস্ত্রশিল্পৰ উন্নতি সাধিবলৈ সক্ষম হৈছে। ইয়াৰ উপৰি মুকুল ডেকাৰ নেতৃত্বত বিভিন্ন সজাগতামূলক সভা আদিকে ধৰি বৃদ্ধাশ্ৰমতো কাৰ্যসূচী গ্ৰহণ কৰিছে।
হস্ততাঁত আৰু বস্ত্রশিল্পৰ ব্যৱসায়ৰ উন্নতি সাধন কৰাৰ বাবে টাইমছ বিজনেছ এৱাৰ্ড লাভ কৰিবলৈ সক্ষম হৈছে মুকুল ডেকাই। টাইমছ অব ইণ্ডিয়াৰ উদ্যোগত মহানগৰীৰ টাজ ভিভাণ্টাত কালি অনুষ্ঠিত হোৱা এক গাম্ভীৰ্যপূৰ্ণ অনুষ্ঠানত ডেকাক এই বঁটা প্ৰদান কৰা হয়। মুকুল ডেকাই এই বঁটা লাভ কৰাৰ পিছতেই উৎফুল্লিত হৈ পৰিছে আৰ্টফেডৰ বিষয়া-কৰ্মচাৰী। আনহাতে বিভাগটোৰ এই উত্থানত যথেষ্ট আনন্দিত হৈ পৰিছে বিভাগীয় মন্ত্রী ৰঞ্জিত দত্ত। এক টেলিফোনিক বাৰ্তালাপত মন্ত্রীগৰাকীয়ে কয় যে এই স্বীকৃতিয়ে বিভাগটোক ভালদৰে কাম কৰাত উৎসাহিত কৰিব।
আৰ্টফেডৰ পৰিচালন সঞ্চালক মুকুল ডেকাক যঁচা এই সন্মানৰ বাবে মন্ত্রীগৰাকীয়ে শুভেচ্ছা জ্ঞাপন কৰে।
