কাৰ্বি আংলংঃ ডিমাপুৰত খটখটি আৰক্ষীয়ে অভিযান চলাই ছয় অপহৰণকাৰীক আটক কৰিবলৈ সক্ষম হয়। আটক ক্ৰমে জান মেছ, ৰঞ্জিত কৰ্মকাৰ, কেলভিন কছাৰী, সুনিপ য়ংগাৰ জমীৰ, দিগঞ্জয় কছাৰী আৰু টেংজাং হাষ্ণু। উল্লেখ্য যে ৩ জুনত বোকাজানৰ খটখটিৰ পৰা অপহৰণ কৰা হৈছিল কল্প নাথ নামৰ এজন যুৱকক।
এখন গেলামাল দোকানৰ স্বত্বাধিকাৰী কল্প নাথ। ইতিমধ্যে কল্প নাথক উদ্ধাৰ কৰিবলৈ সক্ষম হৈছে খটখটি আৰক্ষীয়ে। কল্প নাথক চকুত ক’লা কাপোৰ বান্ধি বিগত ছয় দিন ধৰি ডিমাপুৰৰ পুৰণাবজাৰৰ এটা বাসগৃহত ৰাখিছিল অপহৰণকাৰী দলটোৱে।
অপহৰণকাৰী দলটোৱে কল্প নাথৰ মুক্তিপন দাবী কৰিছিল ৪০ (চল্লিছ) লাখ টকা। খটখটি আৰক্ষীয়ে যোৱা নিশা ডিমাপুৰৰ পৰা ছয় অপহৰণকাৰীক আটক কৰিছে যদিও মূল অভিযুক্ত ডেভিদ কছাৰী বৰ্তমানেও পলাতক।
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।