কলগাছিয়াঃ সদৌ অসম সংখ্যালঘু ছাত্ৰ ইউনিয়ন চমুকৈ আমছুৰ সভাপতি ৰেজাউল কৰিম সৰকাৰে কলগাছিয়াৰ বৰতাৰীত মানাহ নদীৰ গৰাখহনীয়া এলেকা পৰিদৰ্শন কৰে৷ পাৰকুপাইনেৰে চলি থকা গৰাখহনীয়া প্ৰতিৰোধৰ কামত ব্যাপক দুৰ্নীতি হোৱাৰ অভিযোগ উত্থাপন কৰিছে আমছুৰ সভাপতি গৰাকীয়ে৷ গৰাখহনীয়া প্ৰতিৰোধৰ বাবে ৩ কোটি ৩১ লাখ ৯২ হেজাৰ টকা আবণ্টিত ধনৰ মাত্ৰ ৩০ৰ পৰা ৩৫ লাখ টকাৰ কাম কৰি বাকী সমুদায় টকা ঠিকাদাৰ অখিল ৰয়ে আত্মসাৎ কৰাৰ অভিযোগ উত্থাপন কৰে সভাপতি গৰাকীয়ে৷
এইক্ষেত্ৰত বৰপেটাৰ সাংসদ আৰু জনীয়াৰ বিধায়কে ঠিকাদাৰৰ দুৰ্নীতি নীৰৱে চাই থকাৰ বিৰুদ্ধে তীব্ৰ সমালোচনা কৰে ৰেজাউল কৰিম সৰকাৰে৷ ঠিকাদাৰ অখিল ৰয়ৰ আৰু ঠিকাদাৰৰ এই দুৰ্নীতিৰ লগত জড়িত আমোলা-বিষয়াৰ বিৰুদ্ধে সাংসদ আৰু বিধায়কে কঠোৰ ব্যৱস্থা গ্ৰহণ কৰি জেল হাজোতলৈ পঠোৱাৰ ব্যৱস্থা গ্ৰহণৰ আহ্বান জনাইছে৷ অন্যথা এই দুৰ্নীতিৰ সৈতে বৰপেটাৰ সাংসদ আৰু জনীয়া সমষ্টিৰ বিধায়ক জড়িত থকা বুলি গণ্য কৰাৰ লগতে দুয়োগৰাকী প্ৰতিনিধিৰ বিৰুদ্ধে গণতান্ত্ৰিক আন্দোলন গঢ়ি তোলাৰ হুংকাৰ প্ৰদান কৰিছে আমছুৱে৷
