জামুগুৰিহাটঃ চতিয়া সমষ্টিৰ অন্তৰ্গত জয়সিদ্ধিৰ চৌৰাং উচ্চ মাধ্যমিক বিদ্যালয় খেলপথাৰত অহা ১১, ১২ আৰু ১৩ ডিচেম্বৰত তিনিদিনীয়া বৰ্ণাঢ্য কাৰ্যসুচীৰে নিখিল বড়ো ছাত্ৰ সন্থাৰ বিশ্বনাথ জিলাৰ ষষ্ঠ বাৰ্ষিক ও নদুৱাৰ আঞ্চলিক সমিতিৰ ৩৬ তম বাৰ্ষিক অধিৱেশন অনুষ্ঠিত কৰাৰ ব্যাপক প্ৰস্তুতি চলিছে। ইতিমধ্যেই বিদ্যালয় খনিৰ খেলপথাৰত অঞ্চলটোৰ বড়ো যুৱক যুৱতীসকলে জনগোষ্ঠীয় নৃত্যৰ অনুশীলনত ব্যস্ত হোৱা পৰিলক্ষিত হৈছে। উল্লেখযোগ্য যে এই অধিবেশনত শিক্ষা আৰু কৃষিকে ধৰি কেইবাটাও গুৰুত্বপূৰ্ণ বিষয়ৰ ওপৰত চেমিনাৰ অনুষ্ঠিত হোৱাৰ কথা আয়োজক সমিতিয়ে জানিবলৈ দিছে। মূল অনুষ্ঠানভাগত মূখ্য অতিথিৰ আসন অলংকৃত কৰিব চতিয়া সমষ্টিৰ বিধায়ক পদ্ম হাজৰিকা আৰু বিশ্বনাথৰ বিধায়ক প্ৰমোদ বৰঠাকুৰে৷ বিশিষ্ট অতিথি হিচাবে অংশগ্ৰহণ কৰিব বিশ্বনাথ জিলাৰ উপায়ুক্ত মুনিন্দ্ৰ নাটে আৰু আৰক্ষী অধিক্ষক নবিন সিঙে। ইয়াৰ উপৰি বহুকেইগৰাকী বৰেন্য ব্যক্তিয়ে অনুষ্ঠানটিত অংশগ্ৰহণ কৰিব বুলি উদ্যক্তা সকলে জনাইছে৷
