বিজনীত শিক্ষকৰ দুচকীয়া বাহন চোৰ কৰিলে প্ৰাক্তন ছাত্ৰই

বিজনী: চিৰাঙ জিলাৰ বিজনী চহৰত প্ৰাক্তন ছাত্ৰই শিক্ষকৰ AS-26-A -1876 নম্বৰৰ হিৰো গ্লেমাৰ দুচকীয়া বাহন চোৰ কৰি পলায়ন কৰে। ধৃত চোৰজনৰ নাম মকিবুল শিকদাৰ (২৭)। বাহনৰ গৰাকীজনৰ নাম দীপু বড়া। দীপু বড়াৰ ঘৰৰ সন্মুখতে বাহনখন ৰখাই তেওঁ ঘৰৰ ভিতৰলৈ গৈছিল আৰু প্ৰায় দহ মিনিটৰ ভিতৰতে তেওঁ বাহিৰলৈ আহি বাহনখন চোৰে লৈ দ্ৰুত বেগেৰে পলায়ন কৰা প্ৰত্যক্ষ কৰে। ততালিকৈ তেওঁ চোৰ চোৰ বুলি খেদি যায় আৰু বিজনী খান পাৰাৰ স্থানীয় ৰাইজে চোৰজনক আটক কৰে।

বাহনসহ চোৰজনক বিজনী আৰক্ষীক গতাই দিয়ে ৰাইজে। জানিব পৰা মতে ধৃত চোৰজনে পূৰ্বতেও চুৰি কাৰ্যত কাৰাবাস খাটিব লগীয়া হৈছিল। আজি নিজ শিক্ষকৰ বাহন চোৰ কৰি দ্বিতীয়বাৰৰ বাবে ৰঙাঘৰৰ আলহী হ'ল মকিবুল শিকদাৰ। মকিবুল শিকদাৰৰ পাচজনীকৈ পত্নী আৰু দুটা ল'ৰা ছোৱালী বুলি জানিব পৰা গৈছে।