দেৰগাঁওঃ গোলাঘাট জিলাৰ দেৰগাঁৱৰ মৌজাদাৰ আলিৰ ৮ নং ৱাৰ্ডৰ বাসিন্দা তৰুণ বৰা আৰু ৰীণা বৰাৰ পুত্ৰ ৰাজদ্বীপ বৰা ১৮ জুনৰ পৰা ৰহস্যজনক অৱস্থাত নিৰুদ্দেশ হৈ আছে। ইতিমধ্যে পিতৃ তৰুণ বৰাই দেৰগাঁও আৰক্ষী থানাত নিৰুদ্দেশ সংক্ৰান্তত এক এজাহাৰ দাখিল কৰিছে।
যোৱা মঙ্গলবাৰে ৰাজদ্বীপে দেৰগাঁও চাৰিআলিলৈ ঘৰৰ পৰা যোৱাৰ পথত নিৰুদ্দেশ হোৱা বুলি এজাহাৰত উল্লেখ কৰে পিতৃয়ে। পুত্ৰ নিৰুদ্দেশ হোৱাত দিকবিদিক হেৰুৱা পৰিয়ালটোয়ে ৰাজদ্বীপৰ কোনো সন্ধান পালে ৮০১১০৮৭১৯১ নম্বৰত যোগাযোগ কৰিবলৈ আহ্বান জনায়। আনহাতেদি আৰক্ষীৰ এক সূত্ৰই জানিব দিয়ে যে ৰাজদ্বীপৰ বিৰূদ্ধে বোকাখাত আৰক্ষী থানাত এটা গোচৰ ৰুজু হৈছে।
এফালে পুত্ৰ হেৰুৱা সম্পৰ্কে দেৰগাঁও আৰক্ষী থানাত পিতৃৰ গোচৰ আনফালে নিৰুদ্দিষ্ট যুবকৰ বিৰূদ্ধে বোকাখাত থানাত গোচৰ ৰুজু হোৱাত ৰহস্যময় হৈ পৰিছে সমগ্ৰ ঘটনাটো। কিবা কাৰণত ৰাজদ্বীপে আত্মগোপন কৰিছে নে কোনোবাই অপহৰণ কৰিছে আৰক্ষীৰ তদন্তত হে আচল তথ্য পোহৰলৈ আহিব।
