দেৰগাঁও আৰক্ষীৰ জালত এক বৃহৎ বাইক চুৰি চক্ৰ

দেৰগাঁওঃ দেৰগাঁও আৰক্ষীৰ বৃহৎ সাফল্য।দেৰগাঁও আৰক্ষী থানাৰ ভাৰপ্ৰাপ্ত আৰক্ষী বিষয়া প্ৰশান্ত বৰাৰ নেতৃত্বত জালত পৰিল এটা বৃহৎ বাইক চুৰি চক্ৰ। বিগত কিছুদিন ধৰি এই বাইক চুৰি চক্ৰটোৱে সন্ত্ৰাসৰ সৃষ্টি কৰাৰ লগতে আৰক্ষীৰো নিদ্ৰা হৰণ কৰিছিল। দেৰগাঁও আৰক্ষীৰ এটা দল তৎপৰ হৈ আছিল চক্ৰটোক কৰায়ত্ত কৰিবলৈ।

এক গোপন সুত্ৰৰ পম খেদি আৰক্ষীৰ দলটোৱে কেইবাঘণ্টা ধৰি বিভিন্ন স্থানত অভিযান চলাই ৰয়েল এনফিল্ড বাইকসহ আন কেইবাখনো বাইক আৰু স্কুটি উদ্ধাৰ কৰাৰ লগতে জালত পেলাবলৈ সক্ষম হ’ল বাইক চুৰি চক্ৰটোৰ কেইবাজনো সদস্যক। আৰক্ষী সুত্ৰই জানিবলৈ দিয়ামতে দেৰগাঁও আৰক্ষীৰ এই অভিযান অব্যাহত থাকিব।

এই অভিযানত আৰু অধিক দলটোৰ সদস্যক আটক কৰাৰ লগতে চুৰি বাইক উদ্ধাৰ কৰিবলৈ সক্ষম হ’ব বুলি আশা প্ৰকাশ কৰিছে আৰক্ষী সুত্ৰই। দেৰগাঁও আৰক্ষীৰ প্ৰচেষ্টাক শলাগ লৈছে স্থানীয় জনতাই।