নাজিৰা: শিৱসাগৰ জিলাৰ বাৰ্তাজীৱী সংঘ আৰু শিৱসাগৰ জিলা প্ৰশাসনৰ উদ্যোগত শিৱসাগৰ বাণিজ্য মহাবিদ্যালয়, শিৱসাগৰ প্ৰেছ ক্লাব, হাঁহচৰা প্ৰেছ ক্লাব, অ'এন জি চি আৰু সাংবাদিকসকলৰ সহযোগত দেওবাৰে শিৱসাগৰ জিলা বাণিজ্য মহাবিদ্যালয়ত দিনযোৰা কাৰ্যসূচীৰে অনুষ্ঠিত হয় সাংবাদিক কৰ্মশালা। এই সাংবাদিক কৰ্মশালাত কেইবাশৰো বিদ্যালয়-মহাবিদ্যালয়ৰ ছাত্ৰ-ছাত্ৰীৰ লগতে স্থানীয় বহুতো সাংবাদিক, স্থানীয় ব্যক্তিয়ে অংশগ্ৰহণ কৰে। এই সাংবাদিক কৰ্মশালাখন উদ্বোধন কৰে এখন দৈনিক সংবাদ পত্ৰৰ মুখ্য সম্পাদক ডাঃ নিৰ্মল চাহেৱালাই।
অনুষ্ঠানটিত প্ৰশিক্ষক হিচাপে উপস্থিত থাকে সমুদ্ৰ গুপ্ত কাশ্যপ, সুশান্ত তালুকদাৰ, ড° প্ৰতীম শৰ্মা, দিগন্ত বৰগোহাঁই। এই সাংবাদিক কৰ্মশালাতেই শিৱসাগৰ জিলাৰ সাংবাদিক মনোজ গগৈৰ সম্পাদনাৰে "সাংবাদিকতাৰ লেচেৰি" নামৰ এখন গ্ৰন্থও উন্মোচন কৰা হয়। সাংবাদিক কৰ্মশালাৰ অন্তত কৰ্মশালা অংশগ্ৰহণকাৰীসকলক মান-পত্ৰও প্ৰদান কৰা হয়।
