ঢেকিয়াল উচ্চতৰ মাধ্যমিক বিদ্যালয়ৰ প্ৰাক্তন অধ্যক্ষৰ বিয়োগ

দেৰগাঁওঃ গোলাঘাট জিলাৰ ঢেকিয়ালৰ এগৰাকী শিক্ষাবিদ, বিশিষ্ট সমাজকৰ্মী ৰত্নেশ্বৰ দত্তৰ যোৱা নিশা ১০.৪৫ বজাত পৰলোকপ্ৰাপ্তি হয়। উল্লেখ্যযোগ্য যে শিক্ষকতাৰ লগতে বিভিন্ন সামাজিক সংগঠন গঢ়ি থৈ যোৱা ঢেকিয়াল উচ্চতৰ মাধ্যমিক বিদ্যালয়ৰ প্ৰাক্তন অধ্যক্ষ ৰত্নেশ্বৰ দত্তৰ বিয়োগত বিভিন্ন গুণমুগ্ধ লোকে লোকাৰণ্য হয় তেখেতৰ বাসগৃহত।

তেওঁৰ নশ্বৰ দেহক ঢেকিয়াল উচ্চতৰ মাধ্যমিক বিদ্যালয়লৈ লৈ যোৱা হয় আৰু সকলো ছাত্ৰ ছাত্ৰীৰ লগতে শিক্ষক সমাজ আৰু স্থানীয় লোকে শেষ শ্ৰদ্ধাঞ্জলি জ্ঞাপন কৰে। মৃত্যুৰ সময়ত দত্তই পত্নী, অভিনেতা দিলীপ ৰঞ্জন দত্তসহ চাৰিজন পুত্ৰ, চাৰিগৰাকী বোৱাৰী, নাতি-নাতিনী আৰু বহু শুভাকাংখী লোকক এৰি থৈ যায়।