নেৰানেপেৰা বৰষুণঃ নলবাৰীত কৃত্ৰিম বান

নলবাৰীঃ চৰকাৰী কাৰ্যালয় নহয় মৎস্য চিকাৰৰ স্থলী হৈ পৰিছে নলবাৰীৰ বিভিন্ন অঞ্চল। যোৱা দুদিন ধৰি নেৰানেপেৰা বৰষুণৰ ফলত কৃত্ৰিম বানপানীয়ে বুৰাই পেলাইছে সমগ্ৰ নলবাৰী চহৰ। চৰকাৰী কাৰ্যালয়সমূহৰ কাম-কাজত ব্যাঘাত হোৱাৰ লগতে দ অঞ্চলত বাস কৰা বাসিন্দাসকল জলবন্দী হৈ ঘৰতে আবদ্ধ হৈ পৰিছে। নলবাৰী পৌৰ সভাৰ কাণ্ড জ্ঞানহীনতাৰ বাবে যমৰ যাতনা সহিব লগা হৈছে নলবাৰী চহৰবাসীয়ে।

উল্লেখযোগ্য যে সময়ত নলা-নদৰ্মা চাফ চিকুণ নকৰি উন্নয়নৰ বাবে অহা অধিকাংশ ধন পৌৰসভাৰ প্ৰতিনিধিয়ে ঠিকাদাৰৰ লগত মিলি চৰকাৰী ধনৰ শ্ৰাদ্ধ পাতি আহিছে। যাৰ ফলত নলবাৰী চহৰৰ কেইবাটাও কাৰ্যালয়ৰ কাম-কাজ স্থবিৰ হৈ পৰিছে। চহৰখনৰ মাজমজিয়াত থকা চক্ৰ বিষয়াৰ কাৰ্যালয়ৰ ভিতৰে বাহিৰে কেৱল পানী। তদুপৰি উপায়ুক্তৰ কাৰ্যালয়, নলবাৰী কলেজ ৰোডৰ লগতে বিভিন্ন উপপথসমূহ কৃত্ৰিম বানত বুৰ গৈছে।