গোলকগঞ্জঃ ধুবুৰী জিলাৰ গোলকগঞ্জত আজি পৌৰসভাৰ কাৰ্যালয়ৰ দ্বাৰ আনুষ্ঠানিকভাৱে শুভ উদ্বোধন কৰে গোলকগঞ্জৰ বিধায়ক অশ্বিনী ৰায় সৰকাৰে। পৌৰ সভাৰ কাৰ্য্যালয় উদ্বোধনৰ উপলক্ষে গোলকগঞ্জস্থিত জগমোহন বিদ্যাপীঠত এখন ৰাজহুৱা সভা অনুষ্ঠিত হয়। উক্ত সভাত পৌৰোহিত্য কৰে গোলকগঞ্জৰ সমাজ সেৱক প্ৰেমসুক শেঠিয়াই। সভাৰ উদ্দেশ্য ব্যাখ্যা কৰে গোলকগঞ্জ ৰাজহ চক্ৰৰ চক্ৰ বিষয়া তথা পৌৰ সভাৰ কাৰ্যবাহী বিষয়া সোণতৃষ্ণা ঘৰফলীয়াই।
উক্ত সভাত মুখ্য অতিথি হিচাপে উপস্থিত থাকে বিধায়ক তথা অবিচি নিগমৰ অধ্যক্ষ অশ্বিনী ৰায় সৰকাৰ। সীমান্তৱৰ্তী অঞ্চল গোলকগঞ্জ সমষ্টিত পৌৰসভাৰ কাৰ্যালয়ৰ উদ্বোধনে সমষ্টিটোৰ উন্নয়নত অৰিহনা যোগাব। মুখ্যমন্ত্ৰী সৰ্বানন্দ সোণোৱালে সমষ্টিটোৰ উন্নয়নৰ প্ৰতি বিশেষ দৃষ্টি নিক্ষেপ কৰাত অতিশীঘ্ৰেই গংগাধৰ নৈৰ ওপৰত দ্বিতীয়খন দলং নিৰ্মাণ হ’ব বুলি মন্তব্য কৰে অশ্বিনী ৰায় সৰকাৰে। প্ৰথমখন দলং ২০২১ ৰ পূৰ্বে নিৰ্মাণ সম্পূৰ্ণ হ’ব বুলিও মন্তব্য কৰে সৰকাৰে। উক্ত সভাত দীপক কুমাৰ সাহা, ভগিৰথ ওঝা, নিপেন্দ্ৰ নাথ ৰায় নগেণ ৰায়কে ধৰি গোলকগঞ্জ জিলা পৰিষদৰ সদস্য মনিন্দ্ৰ নাথ ৰায় উপস্থিত থাকে।
