ধনশিৰিঃ ধনশিৰি মহকুমাৰ বৰপথাৰৰ কণমানি নিলাভ বৰাই গুৱাহাটীৰ আইটিএ মাছখোৱাত গামোচা মেগা এণ্টাৰটেইণ্টমেণ্ট প্ৰাইভেট লিমিটেডে আয়োজন কৰা ইণ্ডিয়া ইণ্টাৰনেচনেল ষ্টাৰ আইকন ছিজন-৩ত কিডচ্ কেটেগৰীত মিষ্টাৰ কিড ইণ্ডিয়া ইণ্টাৰনেচনেল ইউনিভাৰ্চ-২০১৯ৰ খিতাপ অৰ্জন কৰি সমগ্ৰ ৰাজ্যৰ লগতে ধনশিৰি মহকুমালৈ গৌৰৱ কঢ়িয়াই আনিবলৈ সক্ষম হয়।
প্ৰতিযোগিতাত ত্ৰিপুৰা, মণিপুৰ, পশ্চিম বংগ, ওড়িশা, নাগালেণ্ড আৰু অসমকে ধৰি মুঠ ১০০ৰো অধিক প্ৰতিযোগীয়ে অংশগ্ৰহণ কৰে৷ ষ্টাৰ আইকনৰ ৰাষ্ট্ৰীয় পৰিচালক অভিলেষ কলিতাৰ তত্বাৱধানত অনুষ্ঠিত হোৱা প্ৰতিযোগিতাখনিত ৬ বছৰীয়া সুন্দৰ কণমানি নিলাভে বিচাৰকৰ লগতে দৰ্শকৰ মন জয় কৰি পৰৱৰ্তী সময়ত ভাৰতৰ হৈ আমেৰিকাত হ’বলগীয়া ষ্টাৰ আইকন ইউনিভাৰ্চ ৱৰ্ল্ডৰ বাবে যোগ্যতা অৰ্জন কৰিছে৷
জ্যোতিৰঞ্জন বৰা আৰু চুমি ভৰালী বৰাৰ ৬ বছৰীয়া একমাত্ৰ পুত্ৰ নিলাভ বৰ্তমান বৰপথাৰ অঞ্জলি বৰবৰা মেম’ৰিয়েল একাডেমীৰ দ্বিতীয় শ্ৰেণীত অধ্যয়নৰত৷ নিলাভৰ এই সফলতাত ধনশিৰি মহকুমাবাসীয়ে আনন্দ প্ৰকাশ কৰাৰ লগতে নিলাভৰ উজ্জ্বল ভৱিষ্যত কামনা কৰিছে।
