নাজিৰাঃ শিৱসাগৰ জিলাৰ গড়গাঁৱত অৱস্থিত বেচৰকাৰী শিক্ষানুষ্ঠান এম জি এম কণিষ্ঠ মহাবিদ্যালয়ৰ দশম সংখ্যক নৱাগত আদৰণি সভা শনিবাৰে দিনযোৰা কাৰ্য্যসূচীৰে অনুষ্ঠিত হৈ যায়। এই নৱাগত আদৰণি সভাৰ লগত সংগতি ৰাখি প্ৰথমে মহাবিদ্যালয়খনৰ ছাত্ৰ-ছাত্ৰীসকলে সমবেত সংগীত পৰিৱেশন কৰে। এমজিএম কণিষ্ঠ মহাবিদ্যালয়ৰ অধ্যক্ষ তুলসী শেনচোৱাই সভাপতিত্ব কৰা এই নৱাগত আদৰণি সভাত নিৰ্দিষ্ট বক্তা হিচাপে উপস্থিত থাকে গেলেকী মহাবিদ্যালয়ৰ প্ৰাক্তন অধ্যক্ষ সুৰেশ চেতিয়া, সাংস্কৃতিক কৰ্মী বিজয় কৃষ্ণ দুৱৰা আৰু সাংবাদিক জয়ন্ত বৰুৱা।
নিৰ্দিষ্ট বক্তা সুৰেশ চেতিয়াই মহাবিদ্যালয়ৰ ছাত্ৰ-ছাত্ৰীসকলক সময়ৰ নিয়মানুৱৰ্তিতা, অধ্যয়নৰ ওপৰত সুন্দৰ মন্তব্য আগবঢ়ায়। নৱাগত আদৰণি সভাৰ লগত সংগতি ৰাখি মহাবিদ্যালয়ৰ ছাত্ৰ-ছাত্ৰী সকলে বিভিন্ন সাংস্কৃতিক কাৰ্যসূচী প্ৰদৰ্শন কৰে। লগতে এই বৰ্ষত মহাবিদ্যালয়খনৰ পৰা হাইস্কুল শিক্ষান্ত পৰীক্ষা আৰু উচ্চতৰ মাধ্যমিক চূড়ান্ত পৰীক্ষাত সুখ্যাতিৰে উত্তীৰ্ণ ছাত্ৰ-ছাত্ৰীসকলক এখনি সম্বৰ্ধনা পত্ৰ আৰু এটি গছ পুলিৰে সম্বৰ্ধনা জনোৱা হয়। নৱাগতা আদৰণি সভাখন পৰিচালনা কৰে এমজিএম কণিষ্ঠ মহাবিদ্যালয়ৰ পৰিচালন সঞ্চালক ভাস্কৰ গগৈয়ে।
