তিনিচুকীয়াঃ তিনিচুকীয়া জিলাৰ কাকপথাৰ নিৱাসী ২৪ নং অসম পুলিচ বাহিনীৰ জোৱান সোণেশ্বৰ বৰাই “বাবু জগজীৱন ৰাম নেচনেল সন্মান পদক, ২০১৯ বঁটা” লাভ কৰি অসমলৈ গৌৰৱ কঢ়িয়াবলৈ সক্ষম হৈছে৷ অসম আৰক্ষীৰ হৈ সোণেশ্বৰ বৰাই বহু কেইবাৰ বক্সিং খেলি আহিছে৷ আন্তৰাষ্ট্ৰীয় পৰ্যায়ত ভাৰতৰ হৈ পদক লাভ কৰি অসম তথা ভাৰতবৰ্ষলৈ গৌৰৱ কঢ়িয়াই আনিবলৈ সক্ষম হৈছে তেওঁ৷
ভাৰতক প্ৰতিনিধিত্ব কৰি বিভিন্ন সময়ত আন্তঃৰাষ্ট্ৰীয়ৰ লগতে ৰাষ্ট্ৰীয় খেলজগতখনত পদক লাভ কৰা এই প্ৰতিভাৱান খেলুৱৈজনে ইতিমধ্যে অসম আৰক্ষীৰ পৰা সন্মান লাভ কৰিছে যদিও অসম চৰকাৰৰ পৰা বৰ্তমান সময়লৈকে কোনো সুবিধা লাভ কৰা নাই৷ সোণেশ্বৰ বৰাই প্ৰতিক্ৰিয়া প্ৰকাশ কৰি কয় যে, অসমৰ বিভিন্ন অঞ্চলত বহুতো প্ৰতিভাৱান খেলুৱৈ আছে আৰু ভিতৰুৱা অঞ্চলৰ পৰা সেই খেলুৱৈ সকলক খেলত যোগ দিবৰ বাবে সুবিধা প্ৰদান কৰিলে অসমৰ সন্তানে ভাৰতক প্ৰতিনিধিত্ব কৰিবলৈ সক্ষম হ’ব আন্তঃৰাষ্ট্ৰীয় ক্ষেত্ৰত৷ উক্ত বঁটাসমূহ যোৱা ১১ জুলাইত দিল্লীৰ ৰাজেন্দ্ৰ ভৱনত প্ৰাক্তন লোকসভা অধ্যক্ষ মীৰা কুমাৰৰ উপস্থিতিত প্ৰদান কৰা হয়।
