দেৰগাঁও: খুমটাই, বোকাখাত আৰু দেৰগাঁও সমষ্টিৰ অন্তৰ্গত বানপিড়ীত লোকৰ মাজত খুমটাই সমষ্টিৰ বিধায়ক মৃণাল শইকীয়াই আৰম্ভ কৰা ভ্ৰাম্যমাণ পাকঘৰৰ আজি সপ্তম দিন। এই পাকঘৰৰ যোগেদি সম্পূৰ্ণ নিজা খৰচত বানাক্ৰান্ত ৰাইজক খাদ্যৰ যোগান ধৰি আহিছে বিধায়কগৰাকীয়ে। আজি সপ্তম দিনত ভৰি দিয়া ভ্ৰাম্যমাণ পাকঘৰৰ জৰিয়তে খাদ্য যোগান ধৰা হ'ল দেৰগাঁও বিধানসভা সমষ্টিৰ বাহগুৰি উচ্চ মাধ্যমিক বিদ্যালয়ত থকা শিবিৰত।
বানৰ তাণ্ডৱ শেষ নোহোৱা পৰ্যন্ত বন্যাক্ৰান্ত ৰাইজক প্ৰতিদিনে খাদ্যৰ যোগান ধৰিব বিধায়কগৰাকীৰ নেতৃত্বত এটা ভাৰতীয় জনতা যুৱ মৰ্চাৰ কৰ্মীৰ বৃহৎ দলে। এই ভ্ৰাম্যমাণ পাকঘৰ কাৰ্যসূচীত বিশেষভাৱে সহযোগ কৰিছে বিজেপিৰ উত্তৰ মণ্ডলৰ কাৰ্যকৰ্তা, উত্তৰ মণ্ডল যুৱ মৰ্চাৰ কাৰ্যকৰ্তাসকলে। এই ভ্ৰাম্যমাণ পাকঘৰৰ জৰিয়তে পশ্চিম ব্ৰহ্মপুত্ৰ গাঁও পঞ্চায়তৰ কৰৈয়নি, পুলি কৰৈয়নি অঞ্চলত বানাক্ৰান্তলৈ খাদ্য যোগান ধৰাৰ লগতে মধ্য ব্ৰহ্মপুত্ৰ গাঁও পঞ্চায়তৰ শ'মৰা, ন-পমুৱা আদি অঞ্চলৰ বানাক্ৰান্ত ৰাইজৰ মাজত খাদ্য যোগান ধৰি ৰাইজৰ লগতে বোকাখাত সমষ্টিৰ বিভিন্ন বানাক্ৰান্ত অঞ্চলত খাদ্য সামগ্ৰী যোগান ধৰি সমাদৰ লাভ কৰিবলৈ সক্ষম হৈছে।
ব্যতিক্ৰমী কাৰ্যৰে সংবাদ শিৰোনাম দখল কৰি অহা বিধায়ক মৃণাল শইকীয়াৰ ব্যতিক্ৰমী পদক্ষেপে। সপ্তম দিনত ভৰি দিলে খুমটাই বোকাখাত আৰু দেৰগাঁও সমষ্টিৰ বানাক্ৰান্ত অঞ্চলত ভ্ৰাম্যমাণ পাকঘৰৰ জৰিয়তে বিতৰণ কৰিছে খাদ্য।
