ৰঙাপৰাঃ শোণিতপুৰ জিলাৰ ৰঙাপৰাত বালিপৰাৰ পৰা ৰঙাপৰা অভিমুখে আহি থকা মেজিক গাড়ীত এটি অচিনাক্ত মৃতদেহ উদ্ধাৰ হোৱা ঘটনাই অঞ্চলটোত চাঞ্চল্যৰ সৃষ্টি কৰিছে। ছাৰ্ট আৰ পেণ্ট পৰিহিত লোকজনৰ বয়স আনুমানিক ৫৮ বছৰ হ’ব বুলি আৰক্ষীয়ে সন্দেহ প্রকাশ কৰিছে। অচিনাক্ত মৃতদেহটোৰ লগত একো পৰিচয় পত্ৰ উদ্ধাৰ হোৱা নাই যদিও কিছু ফটো উদ্ধাৰ হৈছে বুলি তদন্তকাৰী আৰক্ষী বিষয়া দিলিপ বৰাই সংবাদ মাধ্যমক অৱগত কৰে।
AS 12 BC 4428 নম্বৰৰ পঞ্জীয়নভুক্ত গাড়ীখনৰ চালকজনে জনোৱা মতে বালিপৰাত ৩ বজাত শাৰীৰিকভাবে অক্ষম লোকজনে গাড়ীখনৰ শেষৰ চিটত বহি ৰঙাপৰা অভিমুখে আহে যদিও ৰঙাপৰাত উপস্থিত হৈ গাড়ীখনৰ পৰা নামি নহাত গাড়ীৰ চালকজনৰ সন্দেহ হয় আৰু তেওঁ মানুহজনক পৰ্যবেক্ষণ কৰে আৰু মানুহজনৰ মুখত তেজ ওলোৱা দেখা পায় ততাতৈয়াকৈ ৰঙাপৰা চিকিৎসালয়লৈ লৈ আনে যদিও চিকিৎসকে লোকজনক মৃত ঘোষণা কৰে আৰু তেখেতে আৰক্ষীকো অৱগত কৰে। আৰক্ষীয়ে মৃতদেহটো মৰণোত্তৰ পৰীক্ষাৰ ব্যৱস্থা গ্ৰহণ কৰিছে।
