চকলাঘাটৰ পুৰণি খাটোৱালত অঘটনঃ কঁঠাল পাৰিবলৈ গৈ কৰুণ মৃত্যু

বেবেজীয়াঃ নগাঁও জিলাৰ হাতীচোং মৌজাৰ চকলাঘাটৰ পুৰণি খাটোৱাল গাঁৱত আজি এক শোকাৱহ ঘটনা সংঘটিত হয়৷ জানিব পৰা মতে স্থানীয় ৰজাগাঁৱৰ দ্ৰুন ৰাজা (৬০) নামৰ এজন ব্যক্তিয়ে নিকটবৰ্তী পুৰণি খাটোৱালৰ ৰূপৰাম (বোপা) তালুকদাৰ নামৰ এজন লোকৰ পদূলিত থকা এজোপা কঁঠাল গছৰ পৰা পকা কঁঠাল পাৰিবলৈ গছত উঠে৷

কিন্ত হঠাৎ তেওঁ কঁঠাল গছৰ ডাল ভাগি তলৰ পকী পথত সৰি পৰে৷ মুখেৰে সামান্য ৰক্তক্ষৰণ হৈ অচেতন হৈ পৰা দ্ৰুন ৰাজাক ততাতৈয়াকৈ চিকিৎসালয়লৈ নিবলৈ প্ৰস্তুতি চলাওতেই তেওঁ শেষ নিশ্বাস ত্যাগ কৰে৷ এনেদৰে কঁঠাল পাৰিবলৈ গৈ এজন সৰবৰহী ব্যক্তিয়ে মৃত্যুক আঁকোৱালি ল’ব লগা হোৱাত আজি সমগ্ৰ অঞ্চলটোতে গভীৰ শোকৰ ছাঁ পৰিছে৷ মৃত্যুৰ সময়ত তেওঁ পত্নীসহ এজন পুত্ৰ, পাঁচগৰাকী জীয়ৰী আৰু বহু আত্মীয়-কুটুম্বক ইহসংসাৰত এৰি থৈ যায়৷