লক্ষীপুৰত বাস্তৱত প্ৰেমিকাক দেখি পচন্দ নোহোৱাত হত্যা কৰিলে প্ৰেমিকেঃ প্ৰেমিকক গ্ৰেপ্তাৰ

লক্ষীপুৰঃ গোৱালপাৰা জিলাৰ লক্ষীপুৰ থানাৰ অন্তৰ্গত ধামৰ বিলত এগৰাকী যুৱতীৰ অৰ্ধ গলিত মৃত্যুদেহ উদ্ধাৰ হোৱা ঘটনাই লক্ষীপুৰত তীব্ৰ উত্তেজনাৰ সৃষ্টি কৰে৷ যুৱতীগৰাকীৰ মৃতদেহ উদ্ধাৰৰ পিছত লক্ষীপুৰ থানাৰ ভাৰপ্ৰাপ্ত বিষয়া দুৰ্লভ চন্দ্ৰ দাসৰ প্ৰচেষ্টাত হত্যাকাৰী ৰেজাউল ইছলামক (ঘৰ বাশবাৰী,গোৱালপাৰা) ৭ ঘণ্টাৰ ভিতৰতে বলবলাৰ(কৃষ্ণাই)পৰা গ্ৰেপ্তাৰ কৰে৷ লক্ষীপুৰ আৰক্ষীৰ জেৰাত হত্যাকাৰী ৰেজাউল ইছলামে জানিবলৈ দিয়া মতে যোৱা ২ মাহ মান আগতে যুৱতী গৰাকীৰ লগত ৰং নম্বৰত চিনাকী হৈছিল আৰু দুয়োৰ মাজত মোবাইল প্ৰেম আৰম্ভ হৈছিল৷

অৱশেষত যোৱা ১৫ জুলাইত বিবাহ হোৱাৰ প্ৰতিশ্ৰুতিৰে কাণ্টাপুৰ নামৰ ঠাইত দুয়ো বাস্তৱত দেখাদেখি হয়৷ যুৱতীগৰাকীক হত্যাকাৰী ৰেজাউল ইছলামৰ পচন্দ নোহোৱাত যুৱতীগৰাকীক ঘৰলৈ উভতি যাবলৈ কোৱাত যুৱতীগৰাকী ঘৰলৈ উভতি যাবলৈ অমান্তি হয়৷ সেইদিনা ৰেজাউলৰ ঘৰত কোনো মানুহ নথকাৰ সুযোগ গ্ৰহন কৰি যুৱতীগৰাকীক ৰাতি নিজ ঘৰলৈ লৈ যায় আৰু শাৰিৰীক সম্পৰ্ক স্থাপন কৰে ৰেজাউলে৷

পিছদিনা পুৱা ৰেজাউলে যুৱতীগৰাকীক ঘৰলৈ উভতি যাবলৈ হেঁচা প্ৰয়োগ কৰাত যুৱতীগৰাকী ঘৰলৈ উভতি যাবলৈ আকৌ অমান্তি হয়৷ পিছত ৰেজাউলে যুৱতীগৰাকীক লৈ গুৱাহাটীলৈ গুছি যায়৷ গুৱাহাটীত কেইঘণ্টা মান অতিবাহিত কৰি গুৱাহাটীৰ পৰা মাকৰি হৈ বাহবাৰী নামৰ ঠাইত ৰাতি ৯ বজাত গাড়ীৰ পৰা নামি দুয়ো খোজকাঢ়ি ৰেজাউল ইছলামৰ ঘৰৰ পিনে গৈ থাকতে ঘৰ পোৱাৰ অলপ আগতে ৰেজাউলে যুৱতীগৰাকীক গলত চেপি হত্যা কৰি জিঞ্জিৰাম নদীত পেলাই দিয়ে৷ হত্যাকাৰী ৰেজাউল ইছলামক কম সময়ৰ ভিতৰত লক্ষীপুৰ আৰক্ষীয়ে চিনাক্ত কৰি গ্ৰেপ্তাৰ কৰাটো লক্ষীপুৰ আৰক্ষীৰ সাফল্য বুলি কব লাগিব৷ হত্যাকাৰী ৰেজাউলৰ ফাঁচীৰ কামনা কৰিছে সচেতন ৰাইজে৷