ৰহাত গৰুভৰ্তি ট্ৰাক জব্দ

ৰহাঃ ৰহাত আৰক্ষীয়ে জব্দ কৰিছে গৰুভৰ্তি এখন ট্ৰাক। বৃহস্পতিবাৰে নিশা ৰহা আৰক্ষীয়ে ৰহাৰ নামগাৱঁৰ পৰা জব্দ কৰে AS 01 JC 3763 নম্বৰৰ এখন ১৪চকীয়া ট্ৰাকসহ ২২টাকৈ চোৰাং গৰু। লগতে আৰক্ষীয়ে আটক কৰিছে তিনিটা গৰু সৰবৰাহকাৰীক। জানিব পৰা মতে নামগাৱঁত চোৰাং গৰু কঢ়িওৱা ট্ৰাকখন এখন এল্ট' গাড়ীত অহা এটা দুবৃৰ্ত্তৰ দলে ৰাজপথতে আগছি ধৰি ট্ৰাকখনৰ চালকক ধৰমতুল থানাৰ এলেকালৈ লৈ যায় আৰু ধন দাবী কৰি আছিল।

তেনে সময়তে ধৰমতুল আৰক্ষী থানাৰ তহলদাৰী আৰক্ষীয়ে দেখা পাই তিনিটা গৰু সৰবৰাহকাৰী আটক কৰি ৰহা আৰক্ষীক গটাই দিয়ে। সৰবৰাহকাৰী কেইটা হৈছে জামাল আলী, কাছেম আলী আৰু মিকি ছুঙো। ৰহা আৰক্ষীয়ে নামগাঁৱৰ পৰা গৰুসহ ট্ৰাকখন জব্দ কৰে। ইপিনে চোৰাং গৰু কঢ়িওৱা ট্ৰাকখনৰ চালক আৰু দুবৃৰ্ত্তৰ দলটো পলাই যায় যদিও আৰক্ষীয়ে এল্ট'খন আৰু গৰাকীক আটক কৰিবলৈ সক্ষম হয়।