গহপুৰঃ বানপানীৰ সমস্যা সম্পূৰ্ণৰূপে মাৰ নৌযাওঁতেই যোৱা নিশা প্ৰায় ১১.৩০ বজাত গহপুৰৰ বাকৰিদলনী পঞ্চায়তৰ অৰ্ন্তগত দক্ষিণ ডাঠকলা পিপলদ্বাৰা গাঁৱৰ ধন বাহাদুৰ ছেত্ৰী আৰু ৰাঙলীয়াল পঞ্চায়তৰ গুৱাধৰা গাঁৱৰ দ্বীপ বৰাৰ ঘৰত এটি বন্য হস্তীয়ে এফালৰ পৰা ভাঙি নিলে ভঁৰাল। খাই তহিলং কৰিলে দুয়োঘৰৰ প্ৰায় ৩০০ টিং সাঁচতীয়া ধান। বহু যত্নেৰে ৰখা ভঁৰালৰ সাচতীয়া ধানমুঠি নিশা বন্যহস্তীটোৱে অনিষ্ট কৰাত এতিয়া মূৰে কপালে হাত দিছে পৰিয়াল দুটিয়ে।
উল্লেখ্য যে এই বনৰীয়া হাতীটোৱে বহু দিন ধৰি অঞ্চলটোৰ বিভিন্ন গাঁওসমূহত তাণ্ডৱ চলাই অহাত গাঁওবাসীয়ে বন বিভাগৰ ওপৰত ক্ষোভ উজাৰিছে। কিয়নো বহু দিন ধৰি হাতীটোৱে সন্ত্ৰাস চলাই থকাৰ স্বত্তেও হাতীটো স্থায়ীভাৱে বনাঞ্চলৈ খেদি পঠিওৱাত বন বিভাগে কোনো ধৰঁৰ গুৰত্ব প্ৰদাণ নকৰি কেৱল কেতিয়াবা হাতীটোৰ পিছে পিছে ঘূৰি থাকিয়েই নিজৰ দায়িত্ব সামৰে।
উল্লেখ্য যে উক্ত বন্যহস্তীটোৰ এটি চকু কণা আৰু তাৰ ফলত হাতীটোৱে কোন দিশে গতি কৰে তাৰ কোনো নিশ্চয়তা নাথাকে। যোৱা ৰাতি গোটেই গাঁওবাসীয়ে উজাগৰী নিশা কটাবলগীয়া এক পৰিস্থিতিৰ সৃষ্টি হয়। বানে জুৰুলা কৰা অঞ্চলটোত এইবাৰ হাতীৰ সন্ত্ৰাস চলাত ৰাইজ একপ্ৰকাৰৰ আতংকিত আৰু চিন্তিত হৈ পৰিছে।
