তিনিচুকীয়া জিলা যুৱ কংগ্ৰেছৰ প্ৰাক্তন উপ-সভাপতি ইন্দ্ৰজিৎ কাশ্যপৰ আকস্মিক বিয়োগ

তিনিচুকীয়াঃ তিনিচুকীয়া জিলা যুৱ কংগ্ৰেছৰ প্ৰাক্তন উপ-সভাপতি, জিলা কংগ্ৰেছৰ সম্পাদক আদি বিভিন্ন দলীয় পদবীত থাকি ৰাইজৰ হকে কাম কৰা সমাজহিতৈষী ব্যক্তি ইন্দ্ৰজিৎ কাশ্যপৰ মঙলবাৰে পুৱা আকস্মিক বিয়োগ ঘটে। ৰাইজৰ মাজত অতি জনপ্ৰিয় ইন্দ্ৰজিৎ কাশ্যপ নম্ৰ, ভদ্ৰ, হাঁহিমুখীয়া, পৰোপকাৰী, অতিথি পৰায়ণ, প্ৰকৃতিপ্ৰেমী হিচাবে সৰ্বজনবিদিত আছিল।

সদায়েই সমাজৰ উন্নয়নৰ কথা চিন্তা কৰা ইন্দ্ৰজিৎ কাশ্যপে আগন্তুক দিনত এজন ৰাজনৈতিক নেতা হৈ সমাজৰ সমস্যাসমূহ দূৰ কৰাৰ সপোন দেখিছিল। কিন্তু নিষ্ঠুৰ নিয়তিৰ পৰিহাসত তেওঁ অকাল মৃত্যুক সাৱটি ল’লে। মৃত্যুৰ সময়ত কাশ্যপে মাতৃ, পত্নী আৰু দুটি সন্তান এৰি থৈ গৈছে। ইন্দ্ৰজিৎ কাশ্যপৰ আকস্মিক মৃত্যুত সমগ্ৰ তিনিচুকীয়া জিলাতে শোকৰ ছাঁ পৰিছে।