ঢকুৱাখনাঃ ৰাজ্যৰ উজনিৰ পৰা নামনিলৈকে বান-পৰিস্থিতিৰ ফলত বিভিন্ন অঞ্চলৰ লাখ-লাখ লোকৰ জীৱন সম্পত্তি নষ্ট হোৱাৰ খবৰ টিভি, বাতৰি কাকত যোগে অৱগত হৈ ঢকুৱাখনাৰ এজন সমাজকৰ্মী তথা অৱসৰপ্ৰাপ্ত অধ্যক্ষই লাভ কৰা পেন্সনৰ এমাহৰ ধন আগবঢ়ালে মুখ্যমন্ত্ৰীৰ বান সাহায্য পূুঁজিলৈ।
ঢকুৱাখনা সমষ্টিৰ ঘিলামৰাৰ এগৰাকী সৰবৰহী সমাজকৰ্মী তথা শিক্ষাবিদ ঘিলামৰা আদৰ্শ উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ ধৰ্মেশ্বৰ হাজৰিকাই আজি দুপৰীয়া ঢকুৱাখনাৰ মহকুমাধিপতি তথা অতিৰিক্ত উপায়ুক্ত অৰিন্দম বৰুৱাৰ হাতত মুখ্যমন্ত্ৰীৰ বান সাহায্য পূুঁজিলৈ তেওঁৰ এমাহৰ পেন্সনৰ ধন ৩১,৩৫৬ টকাৰ চেক প্ৰদান কৰে।
উল্লেখ্য যে হাজৰিকাই ইয়াৰ পূৰ্বেও ঘিলামৰা আদৰ্শ নিম্ন বুনিয়াদী বিদ্যালয়ৰ সোণালী জয়ন্তী বৰ্ষ-২০১৪ ৰ স্মৃতি গ্ৰন্থ 'অভিজ্ঞান’ নিজা খৰচত প্ৰকাশ কৰাৰ উপৰিও ঘিলামৰাৰ কান্ত খনিকৰ ছোৱালী উচ্চ মাধ্যমিক বিদ্যালয়ৰ স্থায়ী পকী তোৰণখনো দাতা হিচাপে আগবঢ়াইছিল।
