নগাঁৱৰ শিঙাৰীত দিন দুপৰতে মটৰ চাইকেল চুৰি

বটদ্ৰৱাঃ নগাঁও জিলাৰ জুৰীয়া আৰক্ষী থানাৰ অন্তৰ্গত শিঙাৰীত দিন দুপৰতে এখন মটৰ চাইকেল চুৰি হোৱা ঘটনাই তীব্ৰ চাঞ্চল্যৰ সৃষ্টি কৰিছে। ঘটনাৰ বিৱৰণী মতে ফাকুলি পথাৰ গাঁৱৰ নিবাসী হেদায়াতুল ইছলাম নামৰ যুৱকজনে শুকুৰবাৰে পবিত্ৰ জুমাৰ নামাজ আদায় কৰাৰ উদ্দেশ্যে AS 02 H 1074 নম্বৰৰ হিৰ’ হুণ্ডা স্প্লেণ্ডাৰ মটৰ চাইকেলখন লৈ শিঙাৰী বজাৰস্থিত জামে মছজিদলৈ যায়।

তাতেই মছজিদ প্ৰাংগনত মটৰ চাইকেলখন থৈ নামাজ পঢ়া সময়তেই চোৰে বাইকখন লৈ উধাও হয়। ঘটনা সন্দৰ্ভত ভুক্তভোগী যুৱকজনে জুৰীয়া আৰক্ষী থানাত এজাহাৰ দাখিল কৰে। এনেদৰে মছজিদৰ প্ৰাংগনৰ পৰা দিন দুপৰতে মটৰ চাইকেল চুৰি হোৱা ঘটনাই চিন্তিত কৰি তুলিছে সমগ্ৰ শিঙাৰীবাসীক।