গহপুৰত স্বাধীনতা দিৱস উদযাপনৰ প্ৰস্তুতি

গহপুৰঃ ৭৩ সংখ্যক স্বাধীনতা দিৱস উদযাপনৰ উপলক্ষে সমগ্ৰ ৰাজ্যবাসীৰ লগতে গহপুৰতো প্ৰস্তুতি অব্যাহত ৰাখিছে। গহপুৰ মহকুমা প্ৰশাসনৰ সৌজন্যত আয়োজিত হ'ব লগীয়া স্বাধীনতা দিৱস উদযাপনৰ উদেশ্যে যোৱা ৮ আগষ্টৰ পৰা গহপুৰ খেলপথাৰত পেৰেডৰ অনুশীলন অব্যাহত ৰাখিছে অসম আৰক্ষীৰ জোৱান তথা এনচিচি আৰু স্কাউট গাইডৰ শিক্ষাৰ্থীসকলে।

ইয়াৰ সমান্তৰালকৈ ১৫ আগষ্টৰ দিনটোৰ দেশপ্ৰেমমূলক বিভিন্ন সাংস্কৃতিক অনুষ্ঠানৰো আয়োজন কৰাৰ প্ৰস্তুতি চলোৱাৰ লগতে গহপুৰ অঞ্চলৰ মুক্তিযোদ্ধাসকলকে উক্ত অনুষ্ঠানলৈ আমন্ত্ৰণ কৰিছে গহপুৰ মহকুমা প্ৰশাসনৰ তৰফৰ পৰা। উল্লেখ্য যে ৮ আগষ্টৰ পৰা আৰম্ভ হোৱা পেৰেড অনুশীলনৰ অন্ত পৰিব অহা ১৩ আগষ্টত। মুঠৰ ওপৰত ১৫ আগষ্টৰ দিনটো উদযাপন কৰিবৰ বাবে প্ৰায় সাজু হৈ উঠিছে গহপুৰ মহকুমা প্ৰশাসন।