ঢকুৱাখনাঃ বিশ্বৰ সৰ্ববৃহৎ গণতান্ত্ৰিক ৰাষ্ট্ৰ ভাৰতৰ ৭৩ সংখ্যক স্বাধীনতা দিৱসলৈ মাজত মাত্ৰ কেইটামান দিন বাকী। দেশৰ বিভিন্ন ৰাজ্য আৰু অঞ্চলৰ লগতে আজি দেখা গৈছে ঘিলামৰা নগৰৰ হাইস্কুল খেলপথাৰত স্বাধীনতা দিৱস উদযাপনৰ বাবে পূৰ্ণ প্ৰস্তুতি চলোৱা হৈছে।
লখিমপুৰ জিলাৰ ঢকুৱাখনাৰ ঘিলামৰা নগৰ হাইস্কুলত অনুষ্ঠিত হ’বলগীয়া এইবাৰৰ স্বাধীনতা দিৱসৰ লগত সংগতি ৰাখি ১০ খনৰো অধিক বিদ্যালয়ৰ ছাত্ৰ-ছাত্ৰীৰ পেৰেড প্ৰদৰ্শনৰ লগতে বিভিন্ন সাংস্কৃতিক অনুষ্ঠানৰো আয়োজন কৰা হৈছে বুলি জানিব পৰা গৈছে।
স্বাধীনতা দিৱসৰ সময়চোৱাত অঞ্চলটোত যাতে কোনো ধৰণৰ কুটাঘাতমূলক কাম-কাজ সংঘটিত নহয় তাৰ প্ৰতি লক্ষ্য ৰাখি ঢকুৱাখনা প্ৰশাসনে কটকটীয়া নিৰাপত্তা ব্যৱস্থা গঢ়ি তুলিছে। আনকি স্বাধীনতা দিৱস উদযাপনৰ প্ৰাকক্ষণত ঘাই পথসমূহত আৰক্ষীয়ে তীক্ষ্ণ দৃষ্টি ৰখাৰ লগতে যান-বাহনসমূহত তালাচী অভিযান অব্যাহত ৰাখিছে।
