ৰূপহীহাটত বনৰীয়া হাতীৰ সন্ত্ৰাসঃ সাতটাকৈ বাসগৃহ লণ্ডভণ্ড

জুৰীয়াঃ বানে ধোৱা লাওখোৱা অভয়াৰণ্যৰ পৰা খাদ্যৰ সন্ধানত নিশা জনাঞ্চললৈ ওলাই অহা হাতীৰ এটা জাকে পূৱ আমৰাকান্দা নামৰ গাঁওখনত তাণ্ডৱ চলাই পাঁচ জনকৈ লোকৰ সাতটাকৈ বাসগৃহ ভাঙি ধ্বংস কৰে। গাঁওখনৰ জালাল উদ্দিন, হোছেন মণ্ডল, পৰিমল মণ্ডল, অনিল মণ্ডল, বিৰাম মণ্ডলৰ ঘৰসমূহ লণ্ডভণ্ড কৰাৰ লগতে ধান চাউলসমূহ খাই তহিলং কৰে হাতীৰ জাকটোৰ উপদ্ৰৱত কথমপি প্ৰাণৰক্ষা ৰাইজৰ।

গৰাজান বনাঞ্চলিক বিষয়া কাৰ্যালয়ৰ গাতে লাগি থকা গাঁওখনত হাতীৰ জাকটোৱে চলোৱা উপদ্ৰৱৰ খবৰ নিশাই বন বিভাগক জনাইছিল যদিও বৰ্তমানলৈকে বিভাগটোৰ কোনো লোক উপস্থিত নোহোৱাৰ অভিযোগ উঠিছে। ইফালে গাঁওবাসীক বিভাগটোৱে নিৰাপত্তা দিয়াত বিফল হোৱাত ৰাইজে প্ৰতিবাদ সাব্যস্ত কৰে।