কাকপথাৰঃ বীৰ লাচিত সেনা ডুমডুমা আঞ্চলিক সমিতিৰ প্ৰথম বাৰ্ষিক প্ৰতিষ্ঠা দিৱস দেওবাৰে দিনযোৰা কাৰ্যসূচীৰে ডুমডুমা শাখা সাহিত্য সভা প্ৰেক্ষাগৃহৰ প্ৰাংগনত অনুস্থিত কৰা হয়৷ এই সভাতেই সংগঠনটোৰ বিষয় ববীয়াই সংবাদ মাধ্যমৰ আগত জানিবলৈ দিয়ে যে বীৰ লাচিত সেনা সদায়ে অসমৰ খিলঞ্জীয়া জাতি জনগোষ্ঠীৰ হৈ কাম কৰি আহিছে আৰু কাম কৰি যাব আৰু বীৰ লাচিত সেনা বৃহত্তৰ অসমীয়া জাতিৰ অস্তিত্ব ৰক্ষাৰ বাবে প্ৰতিজ্ঞাবদ্ধ৷
উক্ত সভাত ডুমডুমাৰ জ্যেষ্ঠ নাগৰিক তথা জ্যেষ্ঠ সাংবাদিক অৰ্জুন বৰুৱাই বক্তব্য প্ৰদানৰ সময়ত জানিবলৈ দিয়ে যে যি দৰে দেশতকৈ মোমাই ডাঙৰ নহয় বুলি বীৰ লাচিতে কৈছিল ঠিক তেনেকৈয়ে অসমৰ খিলঞ্জীয়া অসমীয়া জাতিতকৈ কোনো সংগঠন ডাঙৰ হ’ব নোৱাৰে৷ অসমৰ প্ৰতিটো জাতীয় সংগঠনে অসমৰ খিলঞ্জীয়া জনতাৰ স্বাৰ্থত কাম কৰি যাব লাগিব৷ তেতিয়াহে বৃহত্তৰ অসমীয়া জাতিৰ অস্তিত্ব ৰক্ষা পৰিব৷ সভাৰ শেষত কণ কণ ছাত্ৰছাত্ৰীসকলৰ বিভিন্ন নৃত্য গীতৰ লগতে অসমৰ জাতীয় সংগীতেৰে সভাৰ সামৰণি পৰে৷
