লখিমপুৰঃ লখিমপুৰত শুকুৰবাৰে পুৱা আঠ মান বজাত সংঘটিত হ’ল এক ভয়াবহ অগ্নিকাণ্ড। লখিমপুৰ নগৰৰ ১২ নং ৱাৰ্ডৰ চাপৰি গাৱত সংঘটিত হল এই ঘটনা। দিলোৱাৰ আনচাৰি নামৰ লোক জনৰ ঘৰটো সম্পূৰ্ণ ৰূপে আবৰি পেলালে জুইৰ লেলিহান শিখাই।
ঘৰৰ ভিতৰতে মৃত্যুক সাবটি ললে নাজিমা বেগম নামৰ মহিলা গৰাকীয়ে। আনহাতে গুৰুত্বৰভাবে আহত হ’ল নাজিমা বেগমৰ স্বামী ৰাজু আনচাৰি আৰু শাহুৱেক ফাতেমা বেগম। সম্পূৰ্ণ ৰূপে জুইত জাহ গ’ল দিলোৱাৰৰ আনচাৰি ঘৰখন। অগ্নি কাণ্ড সংঘটিত হোৱাৰ লগে লগেই স্থানীয় ৰাইজে জুই নুমোৱাবলৈ চেষ্টা কৰে যদিও বচাবলৈ সক্ষম নহ’ল মহিলা গৰাকী তথা ঘৰ খনৰ আঁচবাব পত্ৰখিনি ।
আনহাতে অগ্নি নিৰ্বাপক বাহিনীৰ গাড়ী উপস্থিত হৈও দিলোৱাৰ আনচাৰিৰ ঘৰৰ ৰাস্তা ঠেক হোৱাৰ বাবেই জুই নিৰ্বাপন কৰিবলৈ সক্ষম নহ’ল। আৰক্ষীৰ প্ৰাথমিক অনুসন্ধানত গেছ ছিলিণ্ডাৰৰ পৰাই অগ্নিকাণ্ড সংঘটিত হৈছে বুলি জানিব পৰা গৈছে।
