বিহালীঃ সদৌ অসম গোর্খা জনজাতি উন্নয়ন সংস্থাৰ কেন্দ্ৰীয় সমিতিৰ উদ্যোগত আজি এক অভিনন্দন অনুষ্ঠান অনুষ্ঠিত হয়। বিশ্বনাথ চাৰিআলি হিমালয় বিবাহ ভৱনত অনুষ্ঠিত হোৱা অভিনন্দন অনুষ্ঠানত সভাপতিত্ব কৰে সংগঠনটোৰ কেন্দ্ৰীয় উপদেষ্টা বিজয় কুমাৰ চুব্বাই আৰু উদ্দেশ্য বাখ্যা কৰে সাধাৰণ সম্পাদক কৃষ্ণ চুব্বাই। সভাত গোৰ্খা সম্প্ৰদায়ৰ মাজৰ পৰা ২০১৯ বৰ্ষৰ হাইস্কুল শিক্ষান্ত পৰীক্ষাত অসমৰ ভিতৰতে সৰ্বোচ্চ নম্বৰ প্ৰাপ্ত ছাত্ৰী হিমানী গুৰুঙক এককালীন সাহায্য হিচাপে ৫০ হাজাৰ টকা প্ৰদান কৰাৰ লগতে প্ৰায় ৫০ গৰাকীকৈ গোৰ্খা সম্প্ৰদায়ৰ ছাত্ৰ-ছাত্ৰীক অভিনন্দন জ্ঞাপন কৰে।
সভাত কুৰিটাতকৈও অধিক সাংস্কৃতিক নৃত্যৰ দলে নৃত্য প্ৰদৰ্শন কৰি সভাৰ সৌষ্ঠৱ বৃদ্ধি কৰে। অভিনন্দন অনুষ্ঠানটোত সদৌ অসম গোৰ্খা জনজাতি উন্নয়ন সংস্থাৰ সভাপতি গোপাল তামাং মুক্তান, সদৌ অসম ছাত্ৰ সন্থাৰ সহকাৰী সাধাৰণ সম্পাদক দুলদুল বৰকটকী, আগছুৰ বিশ্বনাথ জিলা সমিতিৰ সভাপতি দিলীপ গজুৰেল, লিম্বু মহাসভাৰ কুমাৰ লিম্বু, ভীম চুব্বা, বিৰাত ৰাই মহাসভাৰ বিনীতা ৰাই, মগৰ মহাসভাৰ মহেন্দ্ৰ আলে, ইবৰাজ লামিচানে, গোৰ্খা জনজাতি উন্নয়ন সংস্থাৰ ৰুদ্ৰ গুৰুং, হেমচন্দ্ৰ লিম্বু, তিলক কুমাৰ চুব্বা, গোৰ্খা জনজাতি উন্নয়ন সংস্থাৰ বিকাশ চুব্বা, বিশ্বনাথ মহাবিদ্যালয়ৰ প্ৰবক্তা লোকনাথ লামা, শিক্ষক ৰাজেন্দ্ৰ লিম্বুকে ধৰি গোৰ্খা সম্প্ৰদায়ক প্ৰতিনিধিত্ব কৰা কেইবাটাও গোৰ্খা সংগঠনৰ নেতৃত্ববৃন্দ উপস্থিত থাকি গোৰ্খা সম্প্ৰদায়ৰ উন্নয়নৰ হকে আগন্তুক কাৰ্যপন্থাসমূহৰ ওপৰত বিস্তৃতভাবে বক্তব্য আগবঢ়ায়।
