খাৰিজা বিজনীঃ বৰপেটা জিলাৰ খাৰিজা বিজনী মৌজাৰ অন্তৰ্গত পূৱ পোৰাগাঁৱত বৃহস্পতিবাৰৰ নিশা সংঘটিত হয় এক হৃদয় বিদাৰক ঘটনা৷ এন্ধাৰৰ সুযোগ লৈ কোনো দুষ্কৃতিকাৰীয়ে ৰূপচান মণ্ডল নামৰ দৰিদ্ৰ কৃষকগৰাকীৰ ডেৰবিঘা মটিত ৰোপণ কৰা তিতা কেৰেলাৰ গছ কাটি তহিলং কৰে৷ যাৰ ফলত মূৰে কপালে হাত দিবলগীয়া হৈছে খেতিয়ক ৰূপচান মণ্ডলে৷ প্ৰায় ৭০ হাজাৰ টকা ব্যয়েৰে ৰোপণ কৰা শস্য ডৰা বিক্ৰীৰ আৰম্ভণিতে দুষ্কৃতিকাৰীয়ে কাটি নিঃশেষ কৰাত ভাগি পৰিছে যুৱ খেতিয়কগৰাকী৷
শস্যৰ জুই-ছাই মূল্যৰ সময়তে কোনে এই অমানৱীয় কাণ্ড সংঘটিত কৰিলে তাকে লৈ সমগ্ৰ অঞ্চলটোতে সৃষ্টি হৈছে তীব্ৰ প্ৰতিক্ৰিয়াৰ৷ উক্ত ঘটনাক লৈ দুৰ্ভগীয়া কৃষকগৰাকীয়ে ন্যায় বিচাৰি সৰভোগ আৰক্ষী চকীত এখন এজাহাৰ দাখিল কৰিছে৷ আৰক্ষীৰ হাতত দুষ্কৃতিকাৰী অচিৰেই গ্ৰেপ্তাৰ হ'ব বুলি ভুক্তভোগী পৰিয়াল আৰু স্থানীয় ৰাইজে আশা কৰিছে।
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।