জামুগুৰিহাটঃ জামুগুৰিহাটৰ নিকটৱৰ্তী হাটিঙা ৰামপুৰ গাঁৱৰ অধ্যয়নৰত এগৰাকী ছাত্ৰ দেওবাৰৰ পৰা সন্ধানহীন হৈ থকা ঘটনাই চাঞ্চল্যৰ সৃষ্টি কৰিছে সমগ্ৰ অঞ্চলটিত৷ ৰামপুৰ হাটিঙাৰ প্ৰবীন ওজা আৰু আইমণি ওজাৰ কণিষ্ঠ পুত্ৰ নৱম শ্ৰেণীত অধ্যয়নৰত দীপাংকৰ ওজা হঠাৎ সন্ধানহীন হৈ পৰে৷ হাটিঙা উচ্চ ইংৰাজী বিদ্যালয়ত অধ্যয়নৰত ছাত্ৰজনৰ সন্ধানত পৰিয়ালৰ লোকে আত্মীয় কুটুম্বৰ লগতো যোগাযোগ কৰিছে যদিও কোনো সন্ধান লাভ কৰিবলৈ সক্ষম নহ’ল৷
অন্যহাতে কোনো কোনো লোকে ছাত্ৰগৰাকীক টুপীয়া চেণ্টাৰৰপৰা তেজপুৰ অভিমুখী যাত্ৰীবাহী বাছত উঠি যোৱাও প্ৰত্যক্ষ কৰা বুলিও জানিব পৰা গৈছে৷ সন্ধানহীন ছাত্ৰগৰাকীৰ বৰ্তমানলৈকে কোনো শুংসুত্ৰ লাভ নকৰাত চিন্তাম্বিত হৈ পৰিছে পিতৃ-মাতৃ৷
ইতিমধ্যে ছাত্ৰগৰাকী সন্ধানহীন হোৱা বিষয় লৈ জামুগুৰি আৰক্ষী থানাত এজাহাৰো দাখিল কৰিছে পৰিয়ালবৰ্গই৷ কোনো লোকে সন্ধানহীন হৈ পৰা ছাত্ৰগৰাকীৰ সন্ধান লাভ কৰিলে ৬০০২৩-৫২৭৩৯ ম’বাইল নম্বৰত যোগাযোগ কৰিবলৈ কাতৰ অনুৰোধ কৰিছে পৰিয়ালবৰ্গই৷
