বিলাসীপাৰাঃ বাঙালীপাৰাত মঙ্গলবাৰে আৰক্ষীৰ অভিযান| গোপন খবৰৰ ভিত্তিত চলোৱা অভিযানত উদ্ধাৰ অস্ত্ৰ ভাণ্ডাৰ| এটা হস্তনিৰ্মিত পিষ্টল, এখন চোকা অস্ত্ৰ, এটা এয়াৰ গানসহ উদ্ধাৰ হয় বৃহৎ পৰিমাণৰ গুলী| বাঙালীপাৰাৰ ছাদ্দাম হুছেইন নামৰ যুৱকজনৰ ঘৰৰ পৰা আৰক্ষীয়ে উদ্ধাৰ কৰে অস্ত্ৰসমূহ| লগতে আৰক্ষীয়ে আটক কৰে ছাদ্দাম হুছেইনৰ ঘৰৰ ভিতৰত থকা এগৰাকী যুৱতীক।
বৰ্তমানলৈকে পলাতক অৱস্থাত আছে ছাদ্দাম হুছেইন| মঙ্গলবাৰে এক গোপন সুত্ৰৰ পম খেদি বিলাসীপাৰা আৰক্ষীয়ে বাঙালীপাৰাত চলায় এক অভিযান| বাঙালীপাৰাৰ বাসিন্দা ছাদ্দাম হুছেইনে থকা বাসগৃহত মঙ্গলবাৰে আৰক্ষীয়ে বিলাসীপাৰা গাঁওৰক্ষী বাহিনীৰ সহযোগত চলোৱা অভিযানত অস্ত্ৰ ভাণ্ডাৰটো উদ্ধাৰ হয়| উল্লেখ্য যে আৰক্ষীয়ে চলোৱা অভিযানৰ সময়ত ছাদ্দাম হুছেইন ঘৰত অনুপস্থিত থাকে|
কিন্তু ঘৰৰ ভিতৰত পূৰ্বৰে পৰা থকা এগৰাকী যুৱতীক আৰক্ষীয়ে আটক কৰি থানালৈ লৈ যায়| যুৱতীগৰাকী বিলাসীপাৰা মহকুমাৰ চাপৰৰ ৰজি বেগম বুলি জানিব পৰা গৈছে| ছাদ্দামৰ সৈতে যুৱতীগৰাকীৰ কিহৰ সম্পৰ্ক সেয়া জানিব পৰা নাই| এই ঘটনাই সমগ্ৰ অঞ্চলটোত ব্যাপক চাঞ্চল্যৰ সৃষ্টি কৰিছে|
