বিলাসীপাৰাঃ বিলাসীপাৰাতো ৩ ছেপ্টেম্বৰত অৰ্জুন ভোগেশ্বৰ বৰুৱাৰ ওপজা দিন উদযাপন কৰা হয়। ইয়াৰ লগত সংগতি ৰাখি মঙলবাৰে বিয়লি ৫ মান বজাত বিলাসীপাৰাত অনুষ্ঠিত হয় অভিৰুচি ক্ৰীড়া দিৱস| বিলাসীপাৰা জিলা ক্ৰীড়া সন্থাৰ উদ্যোগত আয়োজিত দিৱসৰ কাৰ্যসূচী অনুসৰি অনুষ্ঠিত কৰা হয় এখনি প্ৰীতি মহিলা ফুটবল মেচৰ। স্থানীয় ৰোকাখাতা উচ্চতৰ মাধ্যমিক বিদ্যালয়ৰ খেলপথাৰত আয়োজিত প্ৰীতি ফুটবল মেচত প্ৰতিযোগী হিচাপে অংশগ্ৰহণ কৰে দুটা মহিলা ফুটবল দল।
কোকৰাঝাৰ জিলাৰ টিপকাই ফুটবল প্ৰশিক্ষণ কেন্দ্ৰ একাদশ আৰু বিলাসীপাৰা জিলা ক্ৰীড়া সন্থা একাদশৰ মাজত অনুষ্ঠিত প্ৰীতি মেচখন উদ্বোধন কৰে বিলাসীপাৰা খণ্ড প্ৰাথমিক শিক্ষা বিষয়া মনোজ কুমাৰ ফুকনে| উত্তেজনাপূৰ্ণ খেলখনত টিপকাই একাদশ দলে জিলা ক্ৰীড়া সন্থা একাদশ দলত ২-১ গলৰ ব্যৱধানত পৰাস্ত কৰি বিজয় সাব্যস্ত কৰিবলৈ সক্ষম হয়। খেলৰ অন্তত বিজয়ী আৰু বিজিত দলক ট্ৰফী প্ৰদান কৰে বিলাসীপাৰা মহকুমা আৰক্ষী বিষয়া সুব্ৰত সেন আৰু বিশিষ্ট শিক্ষাবিদ হৃদয়ানন্দ দাসে।
