বঙাইগাঁও: বঙাইগাঁৱত বহিঃৰাজ্যৰ পৰা আহি পালে ৬৭ জন শ্ৰমিক৷ নতুন দিল্লীৰ পৰা বিশেষ ৰে'লেৰে নিউ বঙাইগাঁও জংচনত উপস্থিত হয় এইসকল শ্ৰমিক৷ বঙাইগাঁও, চিৰাং, গোৱালপাৰা আৰু দক্ষিণ শালমাৰা জিলাৰ এইসকল যাত্ৰী৷ ৰে'লখন জংচনত উপস্থিত হোৱাৰ পিছতে সামাজিক দূৰত্ব অটুত ৰাখি এইসকল লোকক লৈ যোৱা হয় জংচনটোত স্থাপন কৰা স্বাস্থ্য পৰীক্ষা কেন্দ্ৰত৷ স্বাস্থ্য পৰীক্ষাৰ অন্তত তেঁওলোকক বাছেৰে নিজ নিজ জিলালৈ পঠোৱা হব আৰু নিজ জিলাত কোৱাৰেন্টাইন কৰিব৷
সমান্তৰালভাৱে বঙাইগাঁৱৰ যাত্ৰী সকলক নিজ নিজ এলেকাৰ বিদ্যালয় আদি অনুষ্ঠান-প্ৰতিষ্ঠানত কোৱাৰেন্টাইনৰ ব্যৱস্থা কৰিছে প্ৰশাসনে৷ শেহতীয়াকৈ যিহেতু বহিঃৰাজ্যৰ পৰা অহা লোকৰ শৰীৰত অধিক ক'ভিদ-19 পজিটিভ পোৱা গৈছে সেয়ে এই ক্ষেত্ৰত বঙাইগাঁও জিলা প্ৰশাসন যথেষ্ট সজাগ হোৱা পৰিলক্ষিত হৈছে আৰু ৰে'লেৰে আহি পোৱা যাত্ৰী সকলক তন্ন তন্নকৈ স্বাস্থ্য পৰীক্ষাৰ ব্যৱস্থা কৰিছে নিউ বঙাইগাঁও জংচনত৷