নিউজ ডেস্কঃ অৰুণাচল প্ৰদেশে লাভ কৰিব প্ৰথমটো পূৰ্ণাংগ বিমান বন্দৰ। অহা বছৰৰ আগষ্ট মাহত নিৰ্মাণ সম্পূৰ্ণ কৰাৰ লক্ষ্য বিমান বন্দৰটোৰ। ছেপ্টেম্বৰ মাহৰ পৰা নিয়মীয়া বিমান চলাচল আৰম্ভ হোৱাৰ সম্ভাৱনা। হোলোংগী বিমান বন্দৰৰ নিৰ্মাণৰ কাম পূৰ্ণগতিত অব্যাহত আছে। এই বিমানবন্দৰটো পাহাৰীয়া ৰাজ্যখনত প্ৰথম পূৰ্ণাংগ বিমান বন্দৰ হ’ব য’ত ২,৩০০ মিটাৰ ৰানৱে আৰু বয়িং 747ৰ দৰে বিমানৰ উৰণৰ সুবিধা থাকিব।
৩২০ হেক্টৰ এলেকাত বিস্তাৰিত গ্ৰীণফিল্ড বিমানবন্দৰটো সম্পূৰ্ণ হোৱাৰ পিছত প্ৰথম পৰ্যায়ত এয়াৰবাছ এ 321ৰ দৰে জেট বিমান অৱতৰণ কৰিবলৈ সক্ষম হ’ব।অৰুণাচল প্ৰদেশৰ মুখ্যমন্ত্ৰী পেমা খাণ্ডুৱে মঙলবাৰে হোলোংগীৰ গ্ৰীণফিল্ড বিমানবন্দৰৰ স্থান পৰিদৰ্শন কৰে। খাণ্ডুৱে বিমানবন্দৰৰ নিৰ্মাণ কাৰ্যৰ অগ্ৰগতিৰ বুজ লয়। পৰিদৰ্শনৰ পিছত মুখ্যমন্ত্ৰী খাণ্ডুৱে সদৰি কৰে যে ৰানৱেৰ মুঠ ২,৩০০ মিটাৰ দৈৰ্ঘ্যৰ ভিতৰত ১,৫০০ মিটাৰ নিৰ্মাণ সম্পূৰ্ণ হৈছে। ইটানগৰ শীঘ্ৰেই দেশৰ বিমান মানচিত্ৰত থাকিব। এইটো অৰুণাচল প্ৰদেশৰ জনসাধাৰণৰ এটা সপোনৰ প্ৰকল্প।
প্ৰতিবিম্ব লাইভ
'প্ৰতিবিম্ব লাইভ' অসমৰ ডিজিটেল সংবাদ মাধ্যমত এক নৱতম সংযোজন।